Azərbaycanlı FİFA hakimi 39 yaşında karyerasını başa vurdu: “Bu, çox ağır qərar idi”

Azərbaycanlı FİFA hakimi Mübariz Haşımov karyerasını başa vurub.

Futbolxeber.az saytına bu haqda 39 yaşlı yan xətt hakimi özü məlumat verib:

“Bəli, karyeramı bitirdim. Zədə ilə əlaqədar belə qərara gəldim. Bel sinirlərimdə ağrı var idi və bu, ayaqlarıma təsir edirdi. Belimdəki sinir bundan əvvəl də bir neçə dəfə məni narahat etmişdi. Müalicə olunmuşdum. Lakin bir müddət sonra yenə ağrılar başlamışdı”.

Mübariz Haşımov qeyd edib ki, AFFA tərəfindən ayrılan həkim onu müalicə etsə də, ağrılar artıq xroniki hal aldığı üçün bu qərara gəlib: “Son məşqdə ağrı artıq ayağıma təsir edirdi. AFFA tərəfindən ayrılmış həkim müalicəyə başladı. Lakin bu zədə məni uzun müddətdir narahat etdiyi üçün bu qərara gəldim. Çünki hər dəfə müalicə edirdik düzəlirdi, bir müddət sonra yenə tuturdu. Elə vaxt olub qıcolma verib. Adi bir vəziyyətdə, hətta hər hansı bir əşyanı yerdən götürmək istədikdə anidən belimdə sinir tuturdu, bükülü qalırdım. Amma fiziki hazırlığım daima yüksək səviyyədə olub. Buna bütün rəhbərlik heyəti, fiziki məşqçilərimiz, hakim kollektivi şahiddir. Hamı daim formada olduğuma və normativləri yüksək səviyyədə yerinə yetirməyimin şahididir”.

O bildirib ki, qərarı hamı üçün gözlənilməz olub. Hətta həmkarları onu fikrindən daşındırmağa çalışıblar: “Qərarım hamı üçün ani, gözlənilməz oldu, hətta Komitə sədri Fritz Stuchlik və departamentin rəhbəri Cavid Cəlilov, komitə üzvləri mənə tələsməməyi, bir az istirahət edib yenidən fəaliyyət başlamağımı dəfələrlə desələr də, artıq qərarımı vermişdim. Qərar çox ağır, ciddi qərar idi.

Lakin bu ağrıları mən bilirəm, bu ağrıları mən çəkirəm”.

Haşımov təəssüflənsə də, nikbinliyini itirmir: “Təəssüf hissinə gəlincə, qədərimdə belə yazılıb və bunu qəbul etmək lazımdı. Hər işdə xeyir var. Nikbinliyimi və ümidimi itirmirəm, inşallah yaxşı olar”.

Təcrübəli referi qeyd edib ki, gələcək karyerası haqda Hakimlər Komitəsinin sədri Fritz Stuchliklə danışacaq: “Hər kəsə dəstəyə və xoş sözlərə görə, həmçinin, mətbuata öz təşəkkürümü bildirirəm. Bundan sonrakı fəaliyyətimə gəlincə, hal-hazırda komitə sədri bu barədə mənimlə görüş təyin edib və müzakirə aparacağıq. Komitə üzvləri də yaxından maraqlanır öz məsləhətlərini verir, dəstəklərini göstərirlər. Hələ ki özümə gəlim, sonrasına baxarıq”.

Qeyd edək ki, Mübariz Haşımov 2008-ci ildə Azərbaycan Premyer Liqasında debüt edib. 2010-cu ildən FİFA referi köməkçisi idi. Premyerliqa və Azərbaycan kubokunda 220, beynəlxalq arenada isə 60-dan çox oyunda iş başında olub. 2 dəfə U-17 və U-19-ların Avropa çempionatına təyinat alıb.

Əlavə edək ki, Mübariz Haşımovun böyük qardaşı, keçmiş hakim Ceyhun Haşımov 2003-cü ildən Gənc Hakimlər Məktəbində çalışır. 2011-ci ildən 2019-cu ilə kimi Mübariz Haşımov da müəllim kimi həmin məktəbdə fəaliyyət göstərib, neçə-neçə gənc hakimlərin FIFA, Premyerliqa və I divizion səviyyəsinə yüksəlmələrinə köməklik göstərib.