PFL: Liqaların davam etdirilməsinin tərafdarıyıq

Dünyanın bütün sahələrinə, o cümlədən, futbola ciddi təsir göstərmiş Covid-19 virusunun meydana gətirdiyi problemlərdən minimum ziyanla çıxmaq üçün UEFA və FİFA səviyyəsində bir sıra video konfranslar keçirilir, müzakirələr aparılır.

Futbolxeber.az saytının məlumatına görə, belə konfranslardan biri 3 aprel tarixində Avropa Peşəkar Futbol Liqalarına üzv liqalar arasında baş tutdu.

Qitənin futbol üzrə lider ölkələrindən İngiltərə, Almaniya, İtaliya, Fransa və İspaniya təmsilçilərinin də iştirak etdiyi konfrans qurumun prezidenti cənab Lars Krister Olsenin başçılığı ilə reallaşdı. Təşkilatın aktiv üzvlərindən biri kimi Azərbaycan Peşəkar Futbol Liqası da video konfransda nümayəndə ilə təmsil olundu və öz təkliflərini verib, liqalarımızdakı ümumi vəziyyəti iştirakçıların diqqətinə çatdırdı.

Konfransda UEFA, EPFL (Avropa Peşəkar Futbol Liqaları) və AKA (Avropa Klublar Assosiasiyası) prezidentlərinin birgə imzasıyla üzv ölkələrə 2 aprel tarixində ünvanladığı məktubda qeyd olunan məsələlər əsas müzakirə mövzusu oldu. Məktubda yerli çempionatların vaxtından öncə, reqlamentə əsasən bütün oyunlar oynanılmadan başa vurulmasının düzgün olmadığı bildirilirdi. Konfransda iştirak edən Belçika Pro Liqa təmsilçisi onların 2 apreldə çempionatın hazırkı göstəricilərlə yarımçıq başa vurulması ilə bağlı təklif xarakterli qərarı barədə də konfrans iştirakçılarına və təşkilata geniş icmalda məlumat verdi.

Bu və digər məqamlardan irəli gələn məsələlərlə bağlı aşağıdakı məqamlar məsləhət görüldü:

- EPFL öz üzvlərini hər şey məlum olmadan 2019/20 sezonunun başa çatması və 2020/21 sezonunun başlaması ilə bağlı qərar verməkdə tələsməməyə çağırır;

- Yarışların ədalətli davamlılığını fərdi maraqlara qarşı qorumaq hər bir liqanın məsuliyyətidir;

- Bütövlüyü qorumaq üçün hər bir liqanın atdıqları bütün addımları EPFL ilə koordinasiya etməsi vacibdir;

- Əgər həmin ölkədə icazə verilir və razılaşdırılıbsa, yerli çempionatlar mümkün qədər tez davam etməyə başlaya bilər. Bu, təbii ki, rəsmilərin icazəsi və yarışların keçirilməsi zamanı iştirakçı olan hər bir kəs üçün tamamilə təhlükəsiz şərait olduqda baş verəcək;

- Yerli çempionatlar 2020/21 UEFA yarışları üçün seçmə mərhələlər başlamadan tamamlanmalıdır;

- Yerli çempionatların 2020/21 sezonunun sentyabrın ortasından gec və UEFA yarışlarının oktyabrın ortasından sonra başlaması real görünmür.

Əlavə olaraq bildirmək istərdik ki, EPFL üzvləri UEFA nəzdində yaradılan 2 işçi qrupda iştirak edərək üzv ölkələrin maraqlarını müdafiə edir. 1-ci işçi qrup dayandırılan yerli çempionatların və UEFA səviyyəli yarışların davam etdirilməsi üçün yekun optimal oyun cədvəli variantını may ayının ortasına kimi hazırlayıb təqdim edəcək. Ancaq bu, epidemiyanın indiki vəziyyətinə görə nəzərdə tutulan tarixdir və işçi qrup gedişatın hər hansı formada dəyişə biləcəyini də nəzərə alaraq son tarix kimi may ayının ortasına kimi işini davam etdirəcəkdir. Bu səbəbdən federasiyalar, assosiasiyalar və liqalara tələsik qərar verməmələri, çempionatlarını başa vurmaları üçün hazırda yetərincə zaman olduğu bildirildi.

Azərbaycan Peşəkar Futbol Liqası isə öz növbəsində liqaların davam etdirilməsinin elə ilk gündən tərafdarı olduğunu vurğulayıb. Bildirilib ki, hazırda ölkəmizdə bütün idman qurğuları bağlıdır. İdman ictimaiyyəti dövlətin virusa qarşı apardığı mübarizənin tərkib hissəsidir. Əlavə olunub ki, ölkədəki vəziyyətdən və dövlət səviyyəsində verilən qərarlardan asılı olaraq çempionat bərpası ən tez mümkün tarixə qədər saxlanılıb. Klubların durumu, maraqları, fikirləri bizim üçün çox önəmlidir və onlarla məsləhətləşmələr aparıldıqdan sonra qərar verəcəyimizi diqqətə çatdırdıq (pfl.az).