«Qəbələ»dən 6 böyükhesablı qələbə

"Qəbələ”nin futbol akademiyasının komandaları AFFA-nın təşkil etdiyi liqalarda növbəti oyunlarını keçirib.

Fubtolxeber.az saytının məlumatına görə, “Qəbələ” təmsilçiləri 6 böyükhesablı qələbə qazanıb. U-19 səfərdə “Sabah”la qolsuz heç-heçə edib. 13 matçda 29 xal toplayan komanda Gənclər Liqasında 2-ci pillədə qərarlaşıb. “Sabah”ın qonağı olan digər komanda - U-17 səfərdən 2:3 hesablı məğlubiyyətlə qayıdıb. 15 matçda 27 xal yığan “qırmızı-qaralar” 6-cı yerdədir.

U-16 “İsgəndər Cavadov BFA”nı rəqib meydanında 6:0 hesabı ilə məğlub edib. 19 görüşdən sonra 48 xala malik “Qəbələ” liqanın lideridir. “İsgəndər Cavadov BFA”nı qəbul edən U-15 də böyükhesablı qələbə qazanıb - 3:0. 14 görüşdə 40 xal toplayan “qırmızı-qaralar” məğlubiyyətsiz liderliyini davam etdirir.

Paytaxt zonasında mübarizə aparan U-14 “Neftçi” İK İB ilə heç-heçəyə nail olub - 1:1. 16 qarşılaşmadan sonra 32 xala malik “Qəbələ” 4-cü sırada yer alıb. Şimal-Qərb və Qarabağ regionunun Qəbələ zonasında çıxış edən U-13 Yevlax təmsilçisi UGİM “Rabitəçi”ni 4 cavabsız qolla məğlub edib. 14 görüşdə 39 xal yığan “qırmızı-qaralar” 1-ci yerdədir. U-12 Liqasının eyni zonasında mübarizə aparan “Qəbələ” rayonun digər təmsilçisi UGİM-in qapısından 5 cavabsız top keçirib. 14 matçda 42 yığan “Qəbələ” 1-ci, 13 oyunda 23 xal toplayan UGİM 2-cidir. Ardıcıl 15-ci qələbəsini qazanan U-11 Yevlaxın UGİM “Rabitəçi” komandasını 8:0 hesabı ilə məğlub edib. İtkisiz irəliləyən “qırmızı-qaralar” Şimal-Qərb və Qarabağ regionunun Qəbələ zonasında liderdir. U-10 da UGİM “Rabitəçi”ni böyük hesabla yenib - 6:3. Komanda keçirdiyi 14 matçın hamısında qalib gəlməklə zonanın liderliyini qoruyur.