“Sabah”ın baş məşqçisi də “reklam davası” edir?

“Sabah” dünən Premyer Liqanın 14-cü turunda “Neftçi”yə uduzdu. Keçirdiyi oyunların tən yarısında xalsız qalan “Sabah”ın növbəti məğlubiyyəti gözlənilməz olmadı. Əsas sürpriz oyunsonrası mətbuat konfransında, komandanın yeni baş məşqçisi Jelko Sopiçin dedikləri idi. Xorvat mütəxəssis açıqlamaları ilə özündən əvvəl komandanı çalışdıran, hazırkı heyəti formalaşdıran Elşad Əhmədovu, yayda lazımsız legionerlərə milyonlar sərf edən klubun rəhbərliyinə dərsk keçdi.

“Hazırkı heyətlə “Sabah” nəyə nail ola bilər” sualıma Sopiçin “Bu barədə nəsə deməyim düz olmaz. Bu mövzuya girsəm, gərək məndən öncə çalışanlar barədə də danışım. Oyunlara baxmısınızsa, siz özünüz hər şeyi görmüsünüz” cavabını verməsi açıq-aşkar yayda xərclənən milyonların göyə sovrulması demək idi.

Xorvat məşqçinin sonrakı açıqlamaları da klubun mövsümöncəsi həyata keçirdiyi transfeləri darmadağın etdi: “Qışda nəsə dəyişikliklər etməliyik. Bunu görmək üçün məşqçi olmağa ehtiyac yoxdu. Adi azarkeş də bunu hiss edir. Kluba gələrkən mənə dedilər ki, filan futbolçu top səviyyədədi. Bilmirəm mən axmağam? Mənim kifayət qədər təcrübəm var. Qış fasiləsindən sonra əsas komandada Şakir kimi 7-8 oyunçum olacaq. İstəmirəm ki, rəqibin 10, mənim 3 qol şansım olsun. Göyə, Allaha və qapıçının ümidinə qalmaq istəmirəm. Əgər əcnəbi futbolçular alınmasa, 10 azərbaycanlı ilə oynayacam”.

Hər nə qədər ad çəkməsə də, Jelko Sopiç açıq şəkildə izah etdi ki, komandaya bəh-bəhlə gətirilən futbolçularla uğur qazanmaq qeyri-mümkündü. Ona əvvəldən oyunçuların səviyyəsinin yüksək olduğu deyilsə də, meydanda gördükləri əksini sübut edir.

Əslində, “Sabah”da işlərin düz qurulmadığı çoxdan məlumdu. Dəfələrlə yayda xərclənən milyonların göyə sovrulduğunu, bu məşqçi və futbolçularla qarşıya qoyulan məqsədin əlçatmaz olduğu barədə yazmışıq. Lakin təəssüf ki, bəziləri bu yazılanları, haqlı tənqidləri şər, böhtan adlandırdı. Hətta qeyd edilən çatışmazlıqları aradan qaldırmaq əvəzinə klubu haqlı tənqid edən jurnalistləri “reklam davası” etməkdə günahlandırdılar. Başa düşürük, klubun əməkdaşlıq etdiyi mətbuat orqanlarının bəziləri “Sabah”dakı problemləri görməzdən gəlir. Amma hər şey pulla, əməkdaşlıqla ölçülmür, hörmətli cənablar.

Dünən yeni baş məşqçi açıqlamaları ilə özündən əvvəlki məşqçiləri də, transfer çalışmalarına cavabdeh olan klub rəsmilərinin də göydən yerə vurdu. Buyurun, indi ki problemləri “reklam davası” edir dediyiniz jurnalistlər sadalamır, komandanızın baş məşqçisi söyləyir. Özü də bütün çılpaqlığı ilə.

Qış fasiləsində Jelko Sopiç “Sabah”dan uzaqlaşdırılsa, qətiyyən təəccüblənməyin. Rəhbərliyin ayırdığı milyonları göyə sovuranlara çətin ki bu cür həqiqəti söyləyən məşqçi lazım olsun...

İBRAHİM