“Sabah”ın təmkini

Ötən həftə sonu Azərbaycan Premyer Liqasında 8-ci turun oyunları keçirildi. Lider “Qarabağ”ın mövsümdə ilk dəfə xal itirməsi, “Qəbələ”nin əzmkarlığı, “Neftçi”nin ardıcıl üçüncü qələbəsini qazanıb turnir cədvəlində ikinci pilləyə yüksəlməsi və s. Bunlar turdan yaddaqalan məqamlardı.

Turun ən biabırçı mənzərəsi isə “Keşlə” - “Sabah” oyununda yaşandı. Matçın sonunda milli komandamızın da üzvü olan “Sabah”ın futbolçusu Təmkin Xəlilzadə görüşün baş hakimi Kamal Umudlunun üzərinə hücum çəkdi. Komanda yoldaşları heç cür Xəlilzadəni sakitləşdirə bilmədilər. Yekunda polislər futbolçunu meydandan uzaqlaşdırdılar.

Yaşanan insidentin videosunu izləyərkən heyrətə gəlməmək qeyri-mümkündü. Futbol adına biabırçı görüntüdü. Bu hərəkəti edənin milli üzvü olması isə daha acınacaqlıdı.

Gözləmək olardı ki, oyundan sonra futbolçu məsələyə aydınlıq gətirəcək. O cür özündən çıxmasının səbəbini açıqlayacaq. Axı referi futbolçuya nə deyib və yaxud nə baş verib ki, Xəlilzadə Umudlunun üzərinə o cür hücum çəkib. Lakin matçdan sonra hər hansı açıqlamaya rast gəlinmədi. Yalnız bazar ertəsi Xəlilzadə İnstqram hesabından yaşanan biabırçılığa aydınlıq gətirdi. O bildirdi ki, əslində, hakimə normal tərzdə fikirlərini çatdırmaq istəyib: “Ola bilər, bir az emosional alındı. Onun mənə qırmızı vərəqə göstərməsindən sonra isə özümü saxlaya bilmədim”.

“Ola bilər, bir az emosional alındı”dan sonra adam deməyə söz tapmır. Təmkinin “bir az”ı budursa, Allah çoxundan saxlasın.

Qəribə olan məqam “Sabah”ın bu hadisəyə reaksiyası, əslində isə reaksiyasızlığıdır. Oyunun ertəsi bazar gününə təsadüf etdiyindən düşünmək olardı ki, “Sabah” rəsmi şəkildə hadisəyə həftənin ilk iş günü reaksiya verəcək. Ən azı futbolçunun hərəkətinin qınanılacağı, yaxud cəzalanacağı barədə hər hansı açıqlama yayılacaq. Lakin geridə qalan günlər ərzində xoşagəlməz olayla bağlı “Sabah”ın rəsmi saytında bir cümlə belə yoxdu. Sanki heç belə bir hadisə yaşanmayıb. Ya da Təmkin Xəlilzadə “Sabah”ın futbolçusu deyil.

Yalnız bazar ertəsi klubdan mətbuata verilən qısa açıqlamada bildirilmişdi ki, “məsələ araşdırılır”. Maraqlıdı, nəyi araşdırırlar? Futbolçunun hərəkəti göz önündədi. Burda araşdırılmalı nə var ki?

Belə məlum olur ki, “Sabah”ın sponsorları, rəhbərliyi çox təmkinli insanlardı. Hər tur komanda geri addımlayır, amma hər hansı radikal dəyişiklik görmürük. Geridə qalan 8 turda komandanın biabırçı çıxışı bir yana, son insident göstərdi ki, klubda nizam-intizam da yoxdu. Əks halda, bir futbolçu niyə hakimin üzərinə o cür hücum çəksin ki. Nizam-intizam olmayan yerdə isə hər hansı uğurdan söhbət gedə bilməz. Klub rəsmilərinin başı məşqçi axtarışına, yaxud sponsorlara göyə sovrulan milyonlara görə veriləcək hesabata necə qarışıbsa, bu biabırçılığı görməzlikdən gəlirlər.