Qurban Qurbanov: “Sevilya” ilə oyunda yaxşı nəticə əldə edə bilərik”

"Sevilya" kimi komandanın Bakıya gəlməsi Azərbaycan futbolu üçün sevindiricidir. Azarkeşlər bir ilə yaxın bu cür komandaya qarşı canlı oyun izləmirdilər. "Sevilya" Çempionlar Liqasında oynamağa layiq komandadı".

Futbolxeber.az saytının sport24.az-a istinadən verdiyi məlumata görə, bu sözləri "Qarabağ"ın baş məşqçisi Qurban Qurbanov "Sevilya" ilə qarşılaşacaqları Avropa Liqasının qrup mərhələsinin ilk tur matçından öncə mətbuat konfransında deyib.

47 yaşlı mütəxəssisin fikrincə, rəqibin ad-sanına baxmayaraq, öz futbolunu oynamağa çalışacaqlar: "Sabah meydanda güclü kollektiv görəcəyik. Sona qədər mübarizə aparacağıq. Öz meydanımızda oynayırıq. Düşünürəm ki, yaxşı nəticə əldə edə bilərik. Rəqibə qarşı layiqli mübarizə aparmağa çalışacağıq".

Qurbanov zədəli Mahir Emrelinin durumu barədə də danışıb: "Onun vəziyyəti yaxşı deyil. Oyunu buraxacaq. Miçeldən "Sevilya" ilə bağlı məlumat almamışam. Buna ehtiyac da yoxdur. Rəqibi kifayət qədər yaxşı tanıyırıq".

Təcrübəli məşqçi "Sevilya"ya rəhbərlik edən Xulen Lopetegi barədə də fikirləri bölüşüb: "Onunla xüsusi tanışlığım yoxdur. "Real"da və İspaniya millisində işləməsi hər şeydən xəbər verir. Əsl İspaniya futbolunu tələb edən mütəxəssisdir. Mənim də İspaniya futboluna marağım böyükdür. Ən çox izlədiyim çempionat La Liqadır. "Sevilya"nın heyəti barədə danışmağa dəyməz. Hamısının adını çəkmək olar. Sabah layiqli mübarizə aparacağıq və çalışacağıq ki, azarkeşlər oyunumuzdan razı qalsın. Açıqlamalarından məlumdur ki, matça ciddi hazırlaşırlar. Ola bilər ki, "Atletiko"ya qarşı aldığımız nəticələr onları buna vadar edir. İnanmıram ki, hansısa komanda qrupda özünü rahat hiss etsin və ciddi hazırlaşmasın. Rəqib də sabah ciddi olacağını düşünürəm".