Deku Bakı səfərindən danışdı

“İkinci dəfədir ki, Azərbaycanda oluram. Bakıya ilk dəfə futbolçu kimi milli komandanın oyunu üçün gəlmişdim. Həmin vaxt şəhəri görmək imkanımız olmamışdı. Sadəcə, mehmaxana və stadionu görə bilmişdik. Bu dəfə fərqli bir səfər idi. Şəhəri gəzmək imkanım oldu və məndə çox xoş təəssürat yaratdı. Çox sevinirəm ki, yenidən buradayam”.

Futbolxeber.az saytının məlumatına görə, bu sözləri Avropa Liqasının final oyunu ilə əlaqədar "Bakı 2019: Ulduzlar finalı"nda iştirak edən Portuqaliya millisinin sabiq futbolçusu Deku AFFA-nın bu gün keçirilən Hesabat Konfransından sonra baş tutan brifinqdə deyib.

O, Avroliqanın finalında sabiq komandası “Çelsi”nin olmasını istədiyini bildirib: “Burada insanlar çox qonaqpərvərdir. Çox sevinirəm ki, AFFA futbolun inkişafı üçün bu qədər iş görür. Sözsüz ki, mayda keçirilən Avroliqanın finalında da gəlib iştirak edəcəyəm. Avroliqada güclü komandalar çoxdur. Ümid edirəm ki, finalda “Çelsi” olacaq”.