“Sumqayıt” yeni transferini təqdim etdi

2018/2019 mövsümünün üçüncü dövrəsi üçün hazırlıqlarını davam etdirən “Sumqayıt” FK növbəti transferini həyata keçirib. Futbolxeber.az-ın klubun rəsmi saytına istinadən verdiyi məlumata görə, komanda “Maşınsazi” (Təbriz) klubunda çıxış edən əslən azərbaycanlı hücumçu Peyman Babaei ilə müqavilə imzalayıb.

1.5 illik icarə əsasında “Sumqayıt” FK-nın şərəfini qoruyacaq olan Babaei 8 nömrəli formada çıxış edəcək.

Qeyd edək ki, “Traktorsazi” klubunun yetirməsi olan Peyman Babaei Təbriz şəhərində anadan olub. 2015-ci ilə qədər adıçəkilən klubun şərəfini qoruyan 24 yaşlı futbolçu Təbrizin digər klubları “Gostaresh Foolad” (26 oyun, 7 qol) və “Maşınsazi”nin (14 oyun, 3 qol) uğurları üçün çalışıb.