Tərlan Əhmədovu başa düşdük, bəs 0:4?.. (QEYD)

“Neftçi” adına çox acınacaqlı mənzərə yaranıb. Son günlər əksər mətbuat orqanlarında, sosial şəbəkələrdə sabiq və indiki “Neftçi”lilər arasında “atışma” gedir. Komandanın keçmiş baş məşqçisi, haqsız şəkildə işindən uzaqlaşdırılan Tərlan Əhmədov “Uypeşt”dən alınan biabırçı məğlubiyyətdən sonra fikirlərini açıqlayıb. Əhmədovun dedikləri təbii ki, “Neftçi”nin hazırkı rəhbərliyini qane etməyib və onlar sabiq çalışdırıcının cavabını gecikdirməyiblər.

Əhmədovun ardınca “Neftçi”dən uzaqlaşdırılan Kamal Quliyev, eləcə də klubda işinə xitam verilən daha bir neçə nəfər hazırkı rəhbərliyin əleyhinə çıxış ediblər. Tərlan Əhmədov xaric, digərlərindən kimin haqlı, kimin haqsız olduğunu demək çətindir. Bunu tərəflər özləri və Allah bilir.

O ki qaldı Tərlan Əhmədova, “Neftçi” rəhbərliyi nə deyir desin, onun komandadan uzaqlaşdırılması haqsızlıq idi. Komanda qarşıya qoyulan məqsədə çatıbsa, deməli, məşqçi işini görüb, lazım olanı edib. Əhmədovun guya xasiyyəti pis olub, heç kimlə yola getməyib. Əvvəla Tərlan bəyi futbolda olanların çoxu tanıyır. Hamı ilə yola getməyəcək qədər qəliz xasiyyətli biri deyil. Digər tərəfdən də guya “Neftçi”nin əvvəlki məşqçiləri hamı ilə “can deyib, can eşidib”? O ki qaldı qazanılan bürünc medalda kənar amillərin roluna, o “kənar amillər” Vəli Qasımovun da vaxtında olub, Elxan Abdullayevin də. Bəs onda niyə “Neftçi” niyə nəticə qazanmırdı?..

Keçək əsas məsələyə. Son günlərdəki “atışmalar”ın acınacaqlı tərəfi odur ki, bu cür söz-söhbətlər atılıb ortaya, “Neftçi”nin Macarıstan fiaskosu qalıb bir kənarda. Məsələn, son 2 gün ərzində Ceyhun Sultanovun iki müsahibəsini oxumuşam, ikisi də başdan ayağa Tərlan Əhmədova, Kamal Quliyevə cavabdı. “Uypeşt”dən alınan 0:4 hesablı məğlubiyyət barədə 1 cümlə belə yoxdu. Yaxşı, tutaq ki Tərlan Əhmədov pis idi, onu bildik. Bəs 0:4? “Uypeşt” darmadağınının da günahkarı Tərlan Əhmədovu? 3:1-lik qələbədən sonra Macarıstanda çökən komandanın başında da Tərlan Əhmədov dayanmışdı? Budapeştdə axı Tərlan Əhmədov yox idi. Niyə “Neftçi” səfərdə darmadağın oldu? Bunlardan danışmaq lazımdı. Yoxsa ki Tərlan Əhmədov onu dedi, Kamal Quliyev bunu...

Görünən odur ki, “Neftçi” rəhbərliyinə bu hal sərf edir. Çünki uğursuzluq qalıb bir tərəfdə, gündəmi heç bir mahiyyəti olmayan söhbətlər zəbt edib. Bəh-bəhlə gətirilən Bordin, əcnəbilər isə sakit şəkildə yeni mövsümə hazırlaşırlar...

İBRAHİM