Daniyel Subotiç: "Riçard Almeyda Qazaxıstanda ən yaxşılardan olacaq"

“Qəbələ”nin sabiq forvardı, hazırda Qazaxıstanın “Şaxtyor”(Karaqanda) klubunda çıxış edən Daniyel Subotiç Futbolxeber.az saytına açıqlama verib.

O, saytımıza açıqlamasında Riçard Almeydanın “Astana”ya keçidinə münasibət bildirib. Forvard millimizin üzvü haqda xoş sözlər səsləndirib: “

“Bəli, Almeydanın “Astana”ya keçməsindən xəbərdaram. Onun “Astana”ya keçidini burada hamı gördü. Fikrimcə, “Astana” yaxşı transfer edib. Çünki Almeyda çox yaxşı futbolçudu. Mən “Qəbələ”də oynayanda mənə görə Azərbaycanın iki güclü yarımmüdafiəçisi var idi. Onlardan biri Riçard Almeyda, digəri isə Cavid Hüseynov idi. Almeyda sadəcə olaraq super futbolçudu.

Yəqin ki, Roman Qriqorçuk özü Almeydanı “Astana”ya dəvət edib. Şəxsən mənə belə gəlir. Roman Qriqorçuk özü də Azərbaycanda işləyib. Yəqin ki, braziliyalının oyunu onun xoşuna gəlib. Məncə, Almeyda Qazaxıstanda ən yaxşı oyunçulardan biri olacaq. O, ən yüksək səviyyədə oynaya bilər”.