“Kollina Əliyara deyib ki, nəzarətimizdəsən”

“Əliyar Ağayev ardıcıl 2-ci dəfə FİFA-nın Elit və I kateqoriyasına daxil olan hakimlər üçün keçirilən seminara dəvət alıb. Orada normativləri ən yaxşı verən 3 hakimdən biri Əliyar Ağayev olub”.

Futbolxeber.az saytının Antalyaya ezam olunmuş əməkdaşının verdiyi məlumata görə, bu sözləri AFFA Hakimlər Komitəsinin sədri Xaqani Məmmədov azərbaycanlı jurnalistlər üçün keçirdiyi mətbuat konfransında deyib.

X. Məmmədov hazırda Azərbaycanın ən yaxşı hakimi hesab olunan Əliyar Ağayevin UEFA-nın diqqətində olduğunu bildirib: “Bu gün onunla söhbətimiz oldu. Əliyar Pyerluici Kollina ilə görüşün və qısa söhbət aparıb. Kollina deyib ki, sən bizim nəzarətimiz altındasan”.

Hakimlər komitəsinin sədri FİFA referisinin nə zaman I kateqoriyaya keçəcəyi barədə dəqiq söz deməyib: “Əliyar Ağayevin I kateqoriyaya nə zaman keçəcəyini dəqiq bilmirəm. Çünki yalandan vəd vermək istəmirəm. Nə də xal qazanmaq fikrimiz yoxdur. Əliyar Ağayev idarə etdiyi beynəlxalq dərəcəli oyunlarda daim yüksək qiymət alıb.

Bundan başqa, Ömər Paşayev də UEFA-nın diqqət mərkəzindədi. Onun da tezliklə 21 yaşlıların oyunlarına dəvət alacağı gözlənilir”.