PFL prezidenti: “Danışılmış oyunlarla bağlı bəzi klubların izinə düşmüşük”

“Bizim üçün bu dəqiqə I divizion Premyer Liqada daha vacibdi. Çünki klublar ordan yetişməlidir”. Futbolxeber.az saytının məlumatına görə, bu sözləri Antalyada azərbaycanlı jurnalistlər üçün mətbuat konfransı keçirən Peşəkar Futbol Liqasının prezidenti Ramin Musayev deyib.

O, I divizionda bəzi oyunların danışılmış olmasından şübhələndiklərini bildirib: “I divizionda iddialı klublar da var, söz-söhbət yaradacaq klublar da. Aşağı liqada oynayan klublardan istər “Xəzər” olsun, istər digərləri hazır vəziyyətdə olduqları halda Premyer Liqada çıxış edə bilərlər. Danışılmış oyunlarla bağlı bəzi klubların izinə düşmüşük. Rus demişkən, məsələ “vot-vot”dadı. Şübhələr təsdiqini tapsa, dərhal həmin klublar çempionatdan uzaqlaşdırılacaqlar. Özü də həmin klubların adları heç ağlınıza gəlməz. Hansı ki, rəhbərləri geniş danışırlar. O klubları da çempionatdan təmizlədikdən sonra, növbəti mövsüm I divizion daha maraqlı olacaq”. 

İBRAHİM, Antalya