2 il əvvəl "Neftçi"ni, indi də "Səbail"i məğlub edən Akrapoviç: "O, əfsanədi"

Yoxlama oyununda “Səbail”ə 3:1 hesabı ilə qalib gələn Plovdivin “Lokomotiv” klubunun baş məşqçisi Bruno Akrapoviç qarşılaşmadan sonra Futbolxeber.az saytına müsahibə verib.

- Qarşılaşma barədə nə deyə bilərsiz?

- Maraqlı oyun alındı. İlk hissədə “Səbail” yaxşı təsir bağışladı. Onlar aqressiv oyun sərgiləyirdilər. Xüsusən də cərimə meydançamızın yaxınlığında bizə xeyli təhlükə yaşatdılar. Bu səbəbdən də hesabda geri düşdük. Amma fasilədən sonra vəziyyət dəyişdi. Cinahlarda fəallığı artırdıq. Sürəti də yüksəltdik. Məhz cinahdan ötürülən toplar sayəsində rəqib qapısına yol tapdıq. 3 qol vurmaqla oyunun gedişatını öz xeyrimizə dəyişə bildik. İlk hissədə məhz bu məqam istədiyimiz oyunu göstərməyimizə mane olurdu.

- Özünüz də qeyd etdiniz ki, fasilədən sonra “Səbail”i üstələdiniz. Bunu nə ilə əlaqələndirmək olar: rəqibin gücü tükəndi, yoxsa siz ikinci hissədə təzyiqi artırdınız?

- Məncə, biz daha yaxşı oynadıq. Həmkarımın hazırlıq planı ilə tanış deyiləm. Bəlkə də “Səbail” səhər məşq edib, bu səbəbdən də ikinci hissədə istədikləri kimi oynaya bilmədilər. Bunu dəqiq deyə bilmərəm.

- Deyəsən, qırğız hakimlərin idarəçiliyi sizi narazı saldı. Xüsusən də ilk yarıda meydanda tez-tez gərginlik yaşanırdı.

- Bəli, hakim bir neçə epizodda düzgün qərar qəbul etmədi. Onun yanlış qərarları oyunçuları aqressivləşdirirdi. Belədə futbolçulardan kimsə ciddi zədə ala bilərdi. Bu isə nə bizə lazım idi, nə də “Səbail”ə. Hər iki komanda oyunun fair-play ab-havasında keçməsinin tərəfdarı idi.

- Sonuncu dəfə Azərbaycan klubuna nə zaman qalib gəldiyinizi xatırlayırsınız?

- Əlbəttə, xatırlayıram. 2016-cı ilin yayında Avroliqada “Neftçi” ilə üz-üzə gəlmişdik. Bakıda keçirilən matçda qapılara qol vurulmamışdı. İkinci oyunda isə 1:0 hesablı qələbə qazanmaqla növbəti mərhələyə adlamışdıq. “Neftçi” ilə oyunlarımızın çox çətin alındığını xatırlayıram.

- Skopyedə qələbə qazandığınız görüşdə start heyətində yer alan Fəhmin Muradbəyli, eləcə də adı protokola daxil edilən Rahil Məmmədov, Kamal Qurbanov və Aqşin Qurbanlı bu gün “Səbail” formasında komandanıza qarşı oynadılar...

- Sözün açığı, həmin oyunçuları xatırlamadım. Amma deyə bilərəm ki, o zaman “Neftçi”nin heyətində yaxşı futbolçular var idi.

- Siz bosniyalısız və bu yaxınlarda daha əvvəl Azərbaycan millisini çalışdıran Robert Prosineçki Bosniya və Hersoqovina yığmasının baş məşqçisi təyin edildi. Bu təyinata münasibətiniz necədir?

- Prosineçki canlı əfsanədi. Onun təyinatına çox sevindim. Əminəm ki, o, Bosniya millisinə uğur qazandıracaq. Futbolçu kimi böyük uğurlar qazanan Robertonun təyinatının hər iki tərfə üçün uğulu olacağını düşünürəm.

İbrahim CƏFƏROV, Antalya