“Neftçi”nin yeni transferi: “Bu, məni ruhlandırdı”

"Təklif alandan sonra klub haqda məlumat toplamağa başladım. Öyrəndim ki, "Neftçi” köklü və ad-sanlı klubdur. Bu məni ruhlandırdı”.

Futbolxeber.az saytının məlumatına görə,  bu sözləri "Neftçi”nin yeni transferi Fransisko Qarsiya klubun telekanalına müsahibəsində deyib.

Paraqvaylı yarımmüdafiəçi paytaxt klubuna transferi haqda  danışıb. O, “Neftçi”də çıxış edən həmyerlisi Derlis Meza Kolli ilə məsləhətləşdiyini bildirib: "Derlis komanda haqda çox yaxşı sözlər dedi. Bundan sonra "Neftçi”yə keçəcəyimə şübhəm qalmadı. Yeni komandama uyğunlaşmağa çalışıram. Baş məşqçi çox tələbkardır. Bütün böyük klublarda futbolçulardan tələb də böyük olur. Baş məşqçinin tapşırıqlarını yüksək səviyyədə yerinə yetirməyə çalışacağam. Qarşıya qoyulan məqsədlərə çatmaq üçün birlikdə əmək sərf edəcəyik”.

F.Qarsiya ləqəbinin "Qato” olmasına da aydınqlıq gətirib: "Ləqəbini mənə "Serro Portenyo”nun aşağı yaş qruplarında oynayanda fiziki hazırlıq üzrə məşqçimiz verib. "Niyə məhz "Qato?” deyə soruşanda, o mənə gözlərimin pişik gözlərinə bənzədiyini dedi. Buna görə də məni "Qato” deyə çağırmağa başladı. O vaxtdan ləqəbim "Qato”dur. Azarkeşlər, futbolçular, ailəm – hamı mənə "Qato” deyir. Hər bir böyük klub kimi "Neftçi”nin də azarkeşləri möhtəşəmdir. Onların ümidlərini doğrultmaq üçün əlimdən gələni edəcəm. Məqsədimiz kuboka sahib çıxmaqla Avropa Liqasına vəsiqə qazanmaqdır. İnanıram ki, qarşıya qoyulan məqsədlərə çata biləcəyik”.

Qeyd edək ki, "Neftçi” Fransisko Qarsiya ilə bir illik müqavilə bağlayıb.