Simeone: "Roma”nın “Qarabağ”la oyunda xal itirməsini gözləməliyik"

"Bizim üçün əhəmiyyətli oyun idi. Qarşılaşma ərzində fəal idik. Vacib qələbə qazandıq. Bunun sayəsində növbəti mərhələyə adlamaq şansımız qalmaqdadır”.

Futbolxeber.az saytının məlumatına görə, bu sözləri “Atletiko”nun baş məşqçisi Dieqo Simeone Çempionlar Liqasının qrup mərhələsinin 5-ci turunda "Roma"ya 2:0 hesabı ilə qalib gəldikləri oyundan sonra deyib.

O, bu matçın Romadakı ilk qarşılaşmadan elə də fərqlənmədiyini bildirib: "Sadəcə  bu dəfə istədiklərimizi reallaşdırdıq. Qrizmann və Qameyro əlinə düşən imkanlardan istifadə etdilər. Qələbə bizə lazım idi və bunu bacardıq".

Argentinalı mütəxəssis bildirib ki, sonuncu turda keçiriləcək “Roma” - “Qarabağ” görüşünün nəticəsi  onlar üçün önəmli olacaq: "İndi Londonda qalib gəlməli və “Roma”nın “Qarabağ”la görüşdə xal itirməsini gözləməliyik. Başqa variantımız yoxdur”.