Samir Ələkbərov: “Uşaq da bilirdi ki, Almaniyanın bizə 3-dən çox qol vurması mümkündür”

21 yaşadək futbolçulardan ibarət millimiz Avro-2019-un seçmə mərhələsi çərçivəsində öz meydanında Almaniyaya 0:7 hesabı ilə uduzub.

Futbolxeber.az saytının məlumatına görə, oyunsonrası mətbuat konfrasında yığmamızın baş məşqçisi Samir Ələkbərov biabırçı yenilgini belə şərh edib: “Futbolçular meydanda necə əziyyət çəkirdisə, biz də kənarda o cür əziyyət çəkirdik. Səhvlər həddindən artıq çoxdu. Səhvlər üzərində işləməkiyik. Qarşıda Kosova ilə oyun var. Həmin görüşə hazırlaşmalıyıq”.

- Sizi elə gəlmir ki, futbolçularınız bu gün istəksiz görünürdülər?

- Bir var bacarmırsan, bir də var istək yoxdu. Komandamda istək var idi. Oyuna hazırlaşmışdıq. 1:6-dan sonra belə məğlubiyyəti mən də gözləmirdim. Hər iki hissənin əvvəlində qol buraxmağımız bəlkə də uşaqları ruhdan saldı.

- Daha əvvəl də U-21-də çalışırdız və Yaşar Vahabzadənin köməkçisi olaraq yığmanın real gücünü digərlərindən daha yaxşı bilirdiz. 2 oyuna 13 qol buraxdıqdan sonra yığmanı çalışdırdığınız üçün peşman deyilsiz?

- Kimsə bu yükün altına girməliydi. Yığmanı çalışdırdığım üçün peşman deyiləm.

- Bu gün milli üzvlərinin komandamızın 3-dən çox qol buraxacağına pul qoyuluşu etdikləri barədə xəbər yayılıb...

- İnanmıram, belə şey ola bilməz. Uşaq da bilirdi ki, Almaniyanın bizə 3-dən çox qol vurması mümkündür.

- Renat Dadaşovun bugünkü çıxışını necə dəyərləndirə bilərsiz?

- Onu milliyə böyük ümidlərlə dəvət etmişdik. Biz də narazı qaldıq. Amma tək ondan yox, bütün komandadan.  

- Əsas millimizin yeni baş məşqçisi Qurban Qurbanov aşağı yaş qrupu üzrə millilərə də nəzarət edəcək. Bugünkü matçdan öncə onunla söhbətiniz olmuşdu?

- Qurban bəylə 1 dəfə cəmi danışmışdıq. O da Ramil Şeydayevin durumu ilə bağlı. Söhbətimiz zamanı mənə uğurlar arzuladı.

- Kosovoya qarşı keçiriləcək növbəti görüşdə heyətdə dəyişikliklərin olması mümkündür?

- Bəli, mümkündür. Paltardəyişmıə otağı xəstəxanaya dönüb. Görüşdən dərhal sonra futbolçulara bərpa məşqi verdik. Renat Dadaşov, Bəhlul Mustafazadə və daha bir neçə futbolçunun zədəsi var.

- Bəlkə Renat U-21-də oynamaq istəmədiyi üçün zədəni bəhanə edir...

- Xeyr, həkimlə söhbətim oldu. Həqiqətən əzələsini dartıb.