AFFA İcraiyyə Komitəsinin üzvü: “Bu dəfə “Qarabağ” ÇL-də daha uzun yol qət edəcək”

“Xoş təsadüfdən Azərbaycan klubları mütəmadi olaraq avrokubokların ilkin mərhələlərində Gürcüstan təmsilçiləri ilə qarşılaşırlar. Bu, bizi sevindirməyə bilməz. Artıq Gürcüstan klubları üzərində qələbələrimiz ənənəvi hal alıb. Çox şadam ki, “Qarabağ” da Gürcüstan çempionunu mübarizədən kənarlaşdırdı”.

Futbolxeber.az saytına müsahibəsində bu sözləri AFFA İcraiyyə Komitəsinin üzvü Mahir Məmmədov deyib.

M. Məmmədov dünən Tbilisidə Çempionlar Liqasının II təsnifat mərhələsinin cavab oyunu çərçivəsində “Qarabağ”ın “Samtredia”nı 1:0 hesabı ilə məğlub etdiyi görüşü canlı olaraq stadiondan izləyib.

Əməkdaşımızın suallarını cavablandıran Mahir Məmmədov Ağdam klubunun bu mövsüm Çempionlar Liqasında daha uğurlu çıxış edəcəyinə inandığını bildirib:

“Qarabağ” ümumi nəticədə “Samtredia” üzərində 6:0 hesablı qələbə qazandı. Komandamız yoluna davam edir. Artıq növbəti mərhələdəki mümkün rəqiblərimiz də məlumdur. “Qarabağ” həm “Şerif”, həm də “Kukesi”yə qarşı inamlı çıxış edə biləcək gücdədir. İnanıram ki, bu dəfə “Qarabağ”ın ÇL-də yolu daha uzun olacaq”.

FƏRƏC, Tbilisi