Maksim Medvedev: “5 qolu “Qəbələ”yə görə vurmadıq”

“5:0-ı biz də gözləmirdik. Rəqibin oyunlarını izləmişdik. Yaxşı komandadır, futbol oynaya bilirlər. Bizə problem yaratmağa qadir idilər. Əlimizdən gələni etdik ki, bu gün qol buraxmayaq. Böyükhesablı qələbəyə özümüz də sevinirik”.

Futbolxeber.az saytının məlumatına görə, bu sözləri “Qarabağ”ın müdafiəçisi Maksim Medvedev Çempionlar Liqasının II təsnifat mərhələsinin ilk oyununda “Samtredia”nı 5:0 hesabı ilə məğlub etdikləri oyundan sonra deyib.

1 il əvvəl “Qəbələ” də Bakıda “Samtredia”ya 5 qol vurmuşdu. Jurnalistlərdən birinin “bəlkə “Qəbələ”yə görə 5 qol vurdunuz” sualını təcrübəli müdafiəçi belə cavablandırıb:

“Yox, bunun aidiyyatı yoxdu. Oyunda hər şey ola bilərdi. Rəqibi çox yaxşı analiz etmişdik. Demək olar ki, bu gün qapımıza normal zərbə olmadı”.

Medvedev bildirib ki, böyükhesablı qələbəyə baxmayaraq, “Qarabağ”ın oyununu ideal adlandırmaq olmaz:

“Yenə də problemlərimiz var. Anlaşma hələ ki, komandada tam deyil. Yeni futbolçuların uyğunlaşması üçün vaxt lazımdı. Gələn oyunlarda, məşqlərdə formamızı daha yaxşılaşdıracağıq”.