Mədətov: “Top əlimə dəymişdi?"

“Qarabağ”ın hücumçusu Mahir Mədətovun Futbolxeber.az saytına müsahibəsi

- Çempionluq oyunu hesab olunan görüşdə nə “Qarabağ” qol vura bildi, nə “Qəbələ”. Qolsuz heç-heçəni necə dəyərləndirə bilərsən?

- Oyun ağır keçdi. Belə olacağını da gözləyirdik. Qələbə qazanmaq üçün meydana çıxmışdıq. Amma əsas məqsədimiz yaxşı oynamaq, tapşırıqlarım düzgün yerinə yetirmək idi. Çalışsaq da, qol vura bilmədik.

- “Qarabağ”ı artıq çempionluq münasibəti ilə təbrik etmək olar?

- Çempionatın sonuna hələ 3 tur var. Qarşıdakı görüşlərdə də maksimum gücümüzü qoyacağıq ortaya. Boşalmaq olmaz. Çempionluq barədə indidən danışmaq düzgün olmaz.

- Hər halda, 3 tur üçün 4 xal böyük fərqdir...

- İndiki futbolda hər şey mümkündür. 2 tur xal itirsək, “Qəbələ” qələbə qazansa, əziyyətimizə heyif olar. Ona görə də tam gücümüzlə çalışmalıyıq ki, sonra peşman olmayaq.

- Kubokun finalında da “Qəbələ” ilə üz-üzə gələcəksiniz. Həmin matçdan nə gözləmək olar?

- Qarşıda hələ 3 tur var. Finala qədər çempionatdakı çıxışımızı başa vurmalıyıq. Odur ki, hazırda final yox, çempionat barədə düşünürük.

- İkinci hissədə epizodların birində top əlinə dəydi.

- Top əlimə dəymişdi? Baxaram. Amma yadıma gəlmir (gülür). Bəlkə də hissiyatım yoxdu.

Söhbətləşdi: FƏRƏC