Ölkə futbolu

Qriqorçuk: “Tək düşündüyüm qalan oyunlarda və kubokun finalında qalib gəlməkdi”

Şriftin ölçüsü:

09.04.2017 22:50

Bu gün Topaz Premyer Liqasında 25-ci tura start verilib. Futbolxeber.az-ın məlumatına görə, günün ilk oyununda “Qarabağ” evdə “Qəbələ” ilə 0:0 bərabərə qalıb. Tofiq Bəhramov adına Respublika stadionundakı matçdan sonra keçirilən mətbuat konfransında açıqlama verən qonaq komandanın baş məşqçisi Roman Qriqorçuk heç-heçəni belə şərhə edib:

- Təəssüf ki, bu gün qalib gələ bilmədik. Ancaq buna baxmayaraq, komanda verilən tapşırıqları tam yerinə yetirdi. Yolumuza davam edirik. “Qarabağ”a gələn oyunlarda uğurlar arzulayıram.

- Qara Qarayev meydana çıxdıqdan sonra Cavid Hüseynov görünmürdü. Olmazdı ki, onu Rasim Ramaldanovla əvəzləyərək, Rəşad Sadiqovu mərkəzə çəkərdiniz?

- Belə müzakirələr etsək, vaxt çatmaz. Mən düzgün seçim etdiyimi düşünürəm.

- “Qəbələ”nin çempion olub-olmaması sizin klubdakı gələcək taleyinizə nə dərəcədə təsir edəcək?

- Bir ay bunda sonra nə olacağını deyə bilmərik. İndi mənim tək düşündüyüm qalan oyunlarda və kubokun finalında qalib gəlməkdi.

- Matçın sonuna kimi bir hücumçuyla oynadınız. Olmazdı ki, oyunun sonlarında iki hücumçuya şans verəsiz?

- Biz oyun zamanı 4 hücumçuyla oynadıq. Məncə, bu, kifayət idi.

- Sona 3 tur var. “Qəbələ”nin çempionluq şansını nə qədər dəyərləndirirsiz?

- Bunu indidən demək olmaz. Bunlar hamısı tapmacadı. “Qarabağ”ın şansı daha çoxdu. Lakin 3 qələbə 9 xal deməkdi. Yəni hər şey mümkündü.

- Bu gün komandada qələbə üçün nə çatmadı?

- Bu gün “Qarabağ” çox yaxşı oynadı. Ümid edirdik ki, sürət hesabına rəqibi üstələyə bilərik. Ancaq rəqib bunun öhdəsindən layiqincə gəldi.

- “Qəbələ” bu mövsüm bir çox oyunda xal itirdi. Düşünmək olarmı ki, bu mövsümdə “Qəbələ”nin əsas rəqibi “Qarabağ” yox, elə özü olub?

- Bununla müəyyən qədər razıyam. Bəzi oyunlar var idi ki, orda qalib gəlməmək mümkün deyildi. Lakin həmin oyunlarda heç-heçə etmişik. 10-15 qol vəziyyəti yaratsaq da, bunlardan istifadə edə bilməmişik. Ancaq həmin matçlarda yaxşı oyun sərgiləmişdik.

- “Qəbələ” daha çox kubok komandası kimi tanınır. Bu, “Qarabağ”la final oyununda komandaya kömək ola bilər?

- “Qarabağ”ın çempion olmaq şansı daha çoxdu. Çempion olsalar, onlar daha bir titul qazanmaq istəyəcəklər. Bu cəhətdən, məncə, onlar psixoloji cəhətdən daha hazır olacaqlar.

- Sizcə, “Qarabağ”ın çempion olmaq şansı daha çoxdu, yoxsa, “Qəbələ”nin kuboku qazanmaq?

- Belə suallardan sonra düşünürəm ki, mənə məşqçilik lisenziyasıyla birlikdə peyğəmbərlik lisenziyası da lazımdı (gülür). Çünki, belə şeyləri əvvəlcədən müəyyənləşdirmək mümkün deyil.

Xəbəri paylaş