Rahid Əmirquliyev: “Qəbələ” ilə oyunda məqsədimiz xal fərqini artırmaqdır”

“Bilirdik ki, oyun bizim üçün çətin olacaq. Ona görə də “Neftçi” ilə görüşə ciddi hazırlaşmışdıq. Cavab matçında da qələbə qazanmaq istəyirdik. Təəssüf ki, istəyimiz alınmadı”.

Futbolxeber.az saytına müsahibəsində bu sözləri “Qarabağ”ın yarımmüdafiəçisi Rahid Əmirquliyev deyib.

Ölkə kubokunun yarımfinal mərhələsinin cavab görüşündə “Neftçi” ilə qolsuz heç-heçəni şərh edən təcrübəli futbolçu 90 dəqiqə ərzində hər iki komandanın qol vurmaq üçün şansının olduğunu bildirib:

“Neftçi” ilk oyundakı məğlubiyyətlə barışmamışdı. Ona görə də səfərdə sərfəli nəticə qazanmaq istəyirdilər. Lakin rəqibin sevinməsinə imkan vermədik. 90 dəqiqə ərzində hər iki komandanın fərqlənmək üçün şansları oldu. İlk oyundakı qələbə bizi bir qədər rahatlaşdırmışdı”.

Əmirquliyev Premyer Liqanın növbəti turunda “Qəbələ”yə qarşı keçirəcəkləri matçdan da söz açıb:

“Bundan sonra hər oyun finaldı. Çempionatın sonuna az qalıb, xal itirməməliyik. “Qəbələ” ilə oyunda qələbə qazanmaq istəyirik. Bunu bacarsaq, son görüşlərə nisbətən rahat çıxacağıq. “Qəbələ” də qalib gəlmək, bizimlə xal fərqini azaltmaq istəyir. Biz isə evdə çıxış edirik, məqsədimiz xal fərqini daha da artırmaqdır”.