AFFA hakimləri söyən baş məşqçini cəzalandırdı

Bu gün AFFA İntizam Komitəsinin növbəti iclası keçirilib. Futbolxeber.az-ın məlumatına görə, toplantıda Azərbaycan I Divizionunun XXI tur oyunları ilə bağlı da cəzalar açıqlandıb. Sizi həmin qərarlarla tanış edirik:

 

“Energetik” – “Şahdağ” matçında ev sahibi komandanın 4 futbolçusu sarı vərəqə ilə cəzalandığı üçün klub 80 manat cərimə olunub. Həmin matçın 90+1-ci dəqiqəsində “Şahdağ”ın futbolçusu Elnur Şiriyev aqressiv davranışa görə birbaşa qırmızı vərəqə alaraq meydançadan kənarlaşdırıldığı üçün 2 oyun cəzalanıb, klub 160 manat cərimə olunub. Oyunun 90+2-ci dəqiqəsində “Energetik”in futbolçusu Əsgər Nəbiyev kobud oyuna görə birbaşa qırmızı vərəqə alaraq meydançadan kənarlaşdırıldığı üçün 2 oyun cəzalanıb, kluba 160 manat cərimə kəsilib.

 

MOİK – “Şəmkir” matçının 40-cı dəqiqəsində ev sahibi komandanın futbolçusu Mirkamil Əliyev ikinci sarı vərəqə alaraq meydançadan kənarlaşdırıldığı üçün 1 oyun cəzalanıb, klub 20 manat cərimə olunub. Oyunun 60-cı dəqiqəsində MOİK-in baş məşqçisi Ramil Əliyev hakimlər briqadasın təhqir etdiyinə görə 5 oyunluq texniki zonadan uzaqlaşdırılıb, klub 400 manat cərimə olunub. 

 

I Divizionun XX turunun “Zaqatala” – MOİK matçında qonaq komandanın 4 futbolçusu sarı vərəqə ilə cəzalandığı üçün klub 80 manat cərimə olunub.