Telman İsmayılov futboldan danışdı: “Millimizin çıxışı məndə iftixar hissi oyatdı”

Azərbaycanlı iş adamı Telman İsmayılov "APA-Economics"ə müsahibəsində futboldan da danışıb.

Futbolxeber.az saytının məlumatına görə, tanınmış iş adamı Türkiyənin “Antalyaspor” futbol klubunun sponsoru olmağınız barədə də yazılanlara münasibət bildirib.

T. İsmayılov “Gələcəkdə digər klublara dəstək göstərmək niyyətiniz varmı? Hansı idman növü ilə maraqlanırsınız” suallarını belə cavablandırıb:

- Bir zaman mənim belə bir imkanım var idi. Bəzi idman təşkilatlarını, məsələn "Antalyaspor" və digərlərini dəstəkləyirdim. İstərdim ki, nə vaxtsa, yəni problemlər həll olunduqdan sonra Moskva və Azərbaycanda yaxşı idman məktəbi yaradım. Gələcəkdə Azərbaycanda yeni futbol məktəbi yaratmağa hazıram. Hesab edirəm ki, öz ölkəmdə gənc idmançılar yetişdirilməlidir və legionerlərin köməyi olmadan keçinmək lazımdır.

Yeri gəlmişkən, futbol üzrə dünya çempionatının seçmə mərhələsində Azərbaycan yığmasının uğurlu çıxışını qeyd etmək istəyirəm. Startdakı üç oyundan iki qələbə və heç-heçə məndə iftixar hissi oyatdı.