Rəsul Çunayev: “Neftçi”nin oyunçularını tanımıram”

Topaz Premyer Liqasının 16-cı turunda keçirilən “Sumqayıt” - “İnter”lə (2:) oyununu izləyənlər arasında tanınmış idmançı, yunan-Roma güləşi üzrə “Rio-2016”nın bürünc medalçısı, I Avropa Oyunlarının qalibi Rəsul Çunayev də olub.

 

Matçdan sonra Futbolxeber.az-ın suallarını cavablandıran Çunayev qohumunun oyununu izləməyə gəldiyini deyib: “Sumqayıt”da Fərhad Qıstarov oynayır. O mənim yaxın qohumumdur. Ona dəstək olmaq üçün gəlmişdim. Birinci dəfədir ki, futbol matçına gəlirəm. Öz idmanımla əlaqədar olaraq, futbola baxmağa vaxtım olmur. Buraya gəldim ki, Fərhada dəstək olum. “Qəbələ” ilə oyunlarına gedib baxa bilmədim. Bu gün axşam məşqim yoxdu deyə, vaxt tapıb gələ bildim. Yaxının oyununa baxanda həyəcanlanırsan”.

 

Çunayev qeyd edib ki, hətta ölkə futbolunun flaqmanı olan “Neftçi” haqda da məlumatsızdır: “Azarkeşlik etdiyim komanda yoxdur. Ümumiyyətlə “Neftçi”nin heyətində kimlərin oynadığını bilmirəm. Heç bir komandaya azarkeşlik etmirəm. İstər yerli olsun, istər xarici. Çünki vaxt olmur. Səhər-axşam öz idmanımla məşğul oluram”.