“Azərbaycanla oyunda çox müdafə olunmaq məcburiyyətində qaldıq”

19 yaşadək futbolçulardan ibarət İran milli komandasının baş məşqçisi Abas Çəmənian Valentin Qranatkinin xatirəsinə həsr olunmuş 29-cu beynəlxalq turnirdə yığmamıza 0:1 hesabı ilə məğlub olduqları görüşdən danışıb.

Futbolxeber.az saytının məlumatına görə, o, millimizin heyətində güclü futbolçuların yer aldığını bildirib:  

“Rəqibimizi təbrik edirəm. Azərbaycan - heyətində çox güclü futbolçular olan yaxşı komandadır. Bilirdik ki, bu oyun bizim üçün ağır olacaq. Çünki rəqib futbolçular fiziki baxımdan bizdən güclüdür. Bunu nəzərə alaraq, daha çox pressinqə üstünlük verməyə çalışırdıq. Bu gün çox müdafə olunmaq məcburiyyəti qarşısında qaldıq. Buna görə Azərbaycan yığmasına təşəkkür edirəm. Çünki müdafiəçilərimizi öz mövqeyində təcrübə toplamağa vadar etdilər və bu bizim üçün çox faydalıdır”.