“Zirə”dən üç yubiley, ikisinin də ərəfəsində

“Zirə” Topaz Premyer Liqasının XIII turunda 3 yubiley qeyd edib.

Futbolxeber.az saytının məlumatına görə, Bakı klubu üçün “İnter”lə görüş güclülər dəstəsində evdə keçirdiyi 25-ci qarşılaşma olub. 25-ci matç həm də 5-ci heç-heçə ilə əlamətdar olub. 1:1 hesabı ilə başa çatan matçadək zirəlilər öz meydanında 4 dəfə bərabərliklə kifayətlənmişdi.

Qazanılan 1 xal sayəsində “Zirə”nin öz meydanında topladığı xalların cəmi 50-yə çatıb. Paytaxt təmsilçisi 25 görüşdə 15 qələbə qazanıb, 5 heç-heçə edib və eyni sayda məğlubiyyət alıb. Evdə 35-ci qolunu vuran komanda 23-cü dəfə topu qapısından çıxarıb.

Qeyd edək ki, növbəti turun qarşılaşması “Zirə” üçün Premyer Liqada 50-ci, səfərdə 25-ci matç olacaq.