Gəncədə 3 sindrom: Biri qırıldı, biri təxirə düşdü

“Kəpəz” Gəncədə üzləşdiyi ən uğursuz seriyalardan birini qırıb.

Futbolxeber.az saytının məlumatına görə, qərblilər “Neftçi” ilə ev oyunlarındakı qələbəsizliyə Topaz Premyer Liqasının XIII turunda son qoyub. 2002-ci il fevralın 27-də əldə olunan 2:1 hesablı qalibiyyətdən sonra səfərdə 3 xal qazanmasına baxmayaraq, gəncəlilər evdə bunu bacarmırdı. Öz meydanındakı 8 matçda cəmi 2 heç-heçə edib, 6 dəfə uduzan gəncəlilər əzəli rəqibi ilə duellərdəki sindromu 2:0 hesablı qələbə ilə qırıb.

5387 gündən sonra qırılan sindrom “Kəpəz”in tarixində 3 ən uğursuz ev seriyasından biridir. Ardıcıl 9 oyundur “Qarabağ”ın uduzmadığı Gəncə səfərləri “Bakı” üçün də uğurlu alınıb. Paytaxtın eyniadlı klubu bu səfərlərdə 6 oyundur yenilmir. “Neftçi”dən fərqli, digər iki komanda ilə matçlardakı seriyalar qırılmayıb. Lakin “Bakı” peşəkar liqalarda çıxış etmədiyindən bu seriyanın davamı qeyri-müəyyən zamana təxirə düşüb.