“Bizim üçün vacib qələbə idi”

“Futbolçularım bu gün xarakter nümayiş etdirdilər. PAOK-la oyundan sonra bu matça köklənmək çətin idi. Bəlkə də “Zirə” bu gün məğlubiyyətə layiq deyildi. Amma bizim üçün vacib qələbə idi”. Futbolxeber.az saytının məlumatına görə, bu sözləri “Zirə” ilə oyundan sonra (0:2) “Qarabağ”ın baş məşqçisi Qurban Qurbanov deyib.

Təcrübəli mütəxəssis Ağdam klubunun kapitanı Rəşad Sadıqovun “Zirə”yə qarşı oynamamasının səbəbini belə izah edib: “Rəşad zədədən yeni qayıdıb. Bu gün süni örtükdə oynadığımızdan, onu meydana buraxaraq, riskə getmək istəmədim”.

Qurbanov “Zirə”nin komandası üçün asan rəqib olması il bağlı sualı belə cavablandırıb: “Belə demək olmaz. Bu komandaya cəmi 2 dəfə asanlıqla qalib gəlmişik. Sadəcə, biz yuxarı yerlər uğrunda mübarizə aparmaq istəyiriksə, bu cür oyunlarda maksimum xal qazanmalıyıq. Ancaq bu gün “Zirə” yaxşı təsir bağışladı”.