AFFA prezidenti: “Prosineçkiyə narahatlığımı çatdırdım”

"Oyun normal keçdi. Ancaq ələ düşən imkanlardan istifadə aşağı səviyyədə idi". Futbolxeber.az saytının məlumatına görə, bunu AFFA prezidenti Rövnəq Abdullayev deyib.

Yığmamızın San-Marino üzərində 1:0 hesablı qələbəsini dəyərləndirən AFFA prezidenti bildirib ki, komandamızdan narazı qalıb: "Dörd yüz fazilik qol şansımız oldu. Ancaq istifadə edə bilmədik. Tsiklin ilk oyunudu və inanıram ki, gələcəkdə daha yaxşı çıxış edəcəyik. Nəticə yaxşı idi, amma oyun baxımından komanda zəif çıxış etdi. Bundan sonrakı rəqiblər San-Marino kimi olmayacaq. Norveç, Çexiya, Almaniya kimi komandalara qarşı oynamaq o qədər də asan deyil. Baş məşqçiyə də narahatlığımı çatdırdım. Ola bilər ki, Robert Prosineçki müəyyən taktiki dəyişiklər etdi. Yanımda Norveç və Çexiyadan olan nümayəndələr oturmuşdular. Məşqçi ilə danışdım. O, nəticədən razı qaldığını və qol epizodları üzərində daha çox işləyəcəklərini bildirdi. Bu oyunla qrupda nələr edəcəyimizi deyə bilmərəm".

Abdullayev sonda vurğulayıb ki, millinin ehtiyat oyunçular skamyası genişdi və bu da yaxşı rəqabət yaradır.