Şahin Diniyev təqvimdən şikayətləndi: “20 gün fasilə çoxdu” (MÜSAHİBƏ)

“Kəpəz”in baş məşqçisi Şahin Diniyev Futbolxeber.az saytına müsahibə verib.

- Yoxlama oyununda komandanız U-21-ə 1:2 hesabı ilə uduzdu. Görüş barədə nə deyə bilərsiz?

- 5 gün fiziki hazırlıq üzərində çalışmışıq. Yorğunluq fonunda bir oyun keçirmək istəyirdik. U-21-ə uduzsaq da, qarşılaşma bizim üçün faydalı oldu.

- Məğlubiyyətin səbəbini nədə görürsüz?

- Futbolçularda ağırlıq, yorğunluq var idi. Bu da normal haldı. Həmçinin 2 heyətlə oynadıq. Normal qarşılaşma alındı. Hücumlarda rəngarənglik var idi.

- Premyer Liqaının növbəti turunda “Zirə”yə qarşı keçirəcəyiniz oyuna 1 həftədən çox vaxt qalıb. Bundan sonrakı planlarınız nədən ibarətdi?

- Bütün hazırlığımız “Zirə” ilə oyuna hesablanıb. Qarşıdakı bir həftədə taktiki-texniki hazırlığımız olacaq. Daha bir yoxlama oyunu keçirməyi planlaşdırırıq.

- Rəqib müəyyənləşib?

- Yox, hələ ki rəqib axtarışındayıq. Görüş ayın 5-də olacaq.

- Çempiontda yaranan fasilə “Kəpəz”in çıxışına təsir edəcək?

- Fasilə istənilən komandaya təsir edir, oyun ritmini aşağı salır. 20 gün çoxdu. Ümid edirəm ki, gələcəkdə fasilə müddəti qısalacaq. Çempionatın rəngarəng keçməsi, futbolçuların hazır olması milliyə daha xeyirlidi.