Rəşad Sadıqov: “Qol vurduğuma bir anlıq inanmadım”

“Hamını təbrik edirəm. Bu, tək bizim yox, hər kəsin qələbəsidir”. Futbolxeber.az saytına müsahibəsində bu sözləri “Qarabağ”ın kapitanı Rəşad Sadıqov deyib.

Təcrübəli futbolçu “Göteborq”u 3:0 hesabı ilə məğlub etdikləri görüş barədə bunları söyləyib: “Oyundan əvvəl üzərimizdə təzyiq var idi. Çox həyəcanlı idik. Son zamanlar oyunumuz yaxşı alınırdı. Amma nəticə yox idi. Buna görə də eyni halın təkrarlanmasından qorxurduq”.

Təcrübəli futbolçu 3:0 hesabını gözləmədiyini bildirib: “Böyükhesablı qələbə gözləmirdim. Hətta 120 dəqiqəyə də köklənmişdik. Amma oyuna yaxşı başladıq və ardıcıl 2 qol vurdu”.

Sadıqov Azərbaycansayağı künc zərbəsindən qol vurmalarına belə münasibət bildirib: “Bu barədə səhər qərara gəldik. Səhər məşqində fikirləşdik. Qurban müəllimin  bizdən tələbləri var idi. Ona uyğun da hərəkət etdik”.

Meydançanın durumunun yaxşı olmadığını bildirən Rəşad Sadıqov qol vurduqdan sonra sevinməməsi ilə bağlı sualı da cavablandrıb: “Qol vurduğuma bir anlıq inanmadım. Bilmədim qoldu, ya yox. Tərəddüd etdim. Lakin sonradan gördüm ki uşaqlar üstümə gəlir, sevinirlər” (gülür).