Rəşad Sadiqov: “Oyunu kənardan izləmək mənə çox ağır gəlir”

“Oyunu kənardan izləmək mənə çox ağır gəlir. İnanıram ki, komandamız mənim yoxluğumu hiss etdirməyəcək və qələbə qazanmağı bacaracaq”. Futbolxeber.az saytına müsahibəsində bu sözləri “Qəbələ”nin kapitanı Rəşad Sadiqov deyib.

“Qəbələ” hal-hazırda Avropa Liqasının pley-off mərhələsinin ilk oyunları çərçivəsində doğma azarkeşləri önündə “Maribor”u qəbul edir. Zədə səbəbindən sözügedən oyunda iştirak edə bilməyən Sadiqov komandasından yalnız mübariz oyun gözlədiyini vurğulayıb: “Komandamıza heç bir tapşırıq verməmişəm. Lazım olan sözləri baş məşqçimiz deyib. Sadəcə, mən uşaqlara ürək-dirək verirəm. Komandadan mübariz oyun və yalnız qələbə gözləyirəm”.

Sadiqov “Qəbələ”nin qrup mərhələsinə vəsiqə qazanmaq gücündə olduğunu açıqlayıb: “Qrup mərhələsinə vəsiqə qazanmaq şansımız var. Ancaq komandaların şanslarını bərabər qiymətləndirirəm.  Biz “Lill”i keçmişiksə, rəqibimiz də güclü komandalara boyun əydirməyi bacarıb. Kim istəkli olacaqsa, o komandada mərhələ adlayan tərəf olacaq”.

Kapitan zədəsi barədə də danışıb. O, “Maribor”la cavab oyununda iştirak edə biləcəyini deyib: “Zədəm düzəlmək üzrədir. Çalışacam ki, cabab oyununda meydana çıxım. Buna ümid var və 90 faiz cavab oyununda meydanda olacam”.