“İmişli”dən yeni kampaniya: “göndər-qaytar”

Yarandığı gündən Azərbaycan futboluna hər hansı bir faydası dəyməyən, dövlətin milyonlarını göyə sovuran, sənəddə İmişlini təmsil etsə də, reallıqda məşqlərini Bakıda, oyunlarını gah Şamaxıda, gah Qubada, gah Yevlaxda keçirən “İmişli” klubu yeni “kəşf” edib. Hər fürsətdə özünü “yeni nəsil idman funksionerləri” adlandıran klub rəhbərliyi “göndər-qaytar” adlı yeni kampaniyaya start verib. Belə ki, son zamanlar mütəmadi olaraq mətbuatda “İmişli”yə qayıtdı”, “Ronaldo yenidən “İmişli”də”, “İmişli” sabiq legionerini geri qaytardı”, “Vieqaş “İmişli”yə geri döndü” və s. başlıqlı xəbərlər dərc olunur. Məlum olur ki, “İmişli” bir müddət əvvəl ona lazım olmayan, müqaviləsini yeniləmədiyi əcnəbilərə yenidən qucaq açır. Klub son 10 gündə iki sabiq legionerini geri qaytarıb. Əvvəlcə Rafael Vieqaş, daha sonra isə Ronaldo de Souza geri dönüb. Belədə ortaya suallar çıxır. Görəsən, Vieqaş və yaxud Ronaldo komandaya lazım idilərsə, niyə göndərilmişdilər? Yox, lazım deyildilərsə, yenidən komandaya niyə qaytarıldılar?

Klub Vieqaşın gedişini iyulun 4-də açıqlayıb, onun qayıdışı isə sentyabrın 10-da elan olunub. Geridə qalan 2 aydan bir qədər artıq müddətdə Vieqaşda hansı dəyişiklik baş verib ki, o, yenidən komandaya lazım olub? Böyük ehtimalla, portuqaliyalı futbolçu yayda hər hansı komandanın düşərgəsində toplanış da keçməyib, maksimum fərdi məşqlərlə kifayətlənib. Çünki hansısa komandada toplanış keçsəydi, elə orada da qalardı. İndi ortaya başqa bir sual çıxır: iki ay hazırlıq keçməyən futbolçu, kimə, nəyə lazımdır?

Ronaldo de Souza ilə bağlı vəziyyət isə bir qədər fərqlidir. “İmişli” onunla yeni mövsümün startına bir neçə gün qalmış vidalaşmışdı. Ronaldonun gedişi avqustun 4-də elan olunmuşdu. Qayıdışı isə 19 sentyabra təsadüf etdi...

Belə ehtimal etmək olar ki, həmin legionlərin səviyyəsi “İmişli”ni qane etməyib, klub o mövqeyə daha güclü əcnəbi gətirmək istəyib. Lakin axtarışlar bəhrə verməyib, belədə adıçəkilən əcnəbilər geri qaytarılıb. Bu da sizə yeni nəsil klub idarəçiliyi... Sözügedən iki legionerin səviyyəsinin yüksək olmaması “İmişli”dən ayrıldıqdan sonra özlərinə klub tapa bilməmələrindən bəllidir.

Əslində, “İmişli” klubunda bu cür halların baş verməsinə qətiyyən təəccüblənmirik. Çünki ötən mövsümün əvvəlində Fərid Namazovu təcrübəsiz adı ilə baş məşqçi postundan uzaqlaşdıran da “İmişli” idi, bu yay onu həmin vəzifəyə qaytaran da “İmişli”dir. Sanki bir ildə Fərid bəy böyük təcrübə qazandı. Səhv anlaşılmasın, biz azərbaycanlı məşqçilərin işsiz qalmalarının tərəfdarı deyilik. Hələ bir il əvvəl də klub rəhbərliyinin Fərid Namazova qarşı haqsız davrandığını yazmışdıq. Sözümüzün canı klub rəhbərliyinin anlaşılmaz qərarlarıdır.

Bu, həmin “İmişli”dir ki, ötən ayın sonlarında bir müddət əvvəl müqavilə imzaladığı anqolalı futbolçu Dominqos Senqui Hermenegildo ilə yollarını ayırmışdı.

Əslində, biz də qəribə adamlarıq. Nə qoyub, nə axtarırıq. Sanki hər dəfə İmişliyə qayıtmaqdan danışan, yeni stadionun planlarını quran klub rəhbərliyi ən vacib işin öhdəsindən gəlib, qalıb digər məsələlər. Görəsən, aldıqları torpaq sahəsinin axırı nə oldu? Görəsən, yeni stadionun bünövrəsi nə vaxt qoyulur? O qədər sual var ki... Sonra da “İmişli”ni tənqid edəndə razılaşmırlar. Tamam, biz yanlış deyirik, o zaman siz söyləyin, iki ildə Premyer Liqada olduğu müddətdə bu klubun Azərbaycan futboluna hansı faydası dəyib? Hansı işlər görülüb? Hanı nəticəsi? Bəlkə İmişlidə stadion, baza tikilib, xəbərimiz yoxdur, bəlkə “İmişli”dən bu iki ildə Azərbaycan millisinə 3-5 futbolçu dəvət alıb, biz bilmirik?.. Uzun sözün qısası, heyif göyə sovrulan milyonlara...

İBRAHİM