Yankauskas: “Azərbaycanda prioritet klub futboludur, milli yox”

Litva milli komandasının baş məşqçisi Edqaras Yankauskas Millətlər Liqasının qarşıdakı oyunlar, o cümlədən Azərbaycanla matç haqda danışıb.

Futbolxeber.az saytının məlumatına görə, Litva mətbuatına danışan Yankauskas qarşıdakı matçlarda qələbə üçün çalışacaqlarını bildirib:

“Ən yaxşı formada olan oyunçulardan ibarət heyət yaratmışıq. Əminəm ki, asan oyun olmayacaq və heç kim bizə asan qələbə qazanmağa imkan verməyəcək. Həqiqətən bizi çətin matçlar gözləyir. Yalnız bacarıqlarımızı, səylərimizi, istəklərimizi və fədakarlığımızı maksimum dərəcədə artırmaqla nəyəsə nail ola bilərik".

51 yaşlı mütəxəssis Azərbaycan millisi haqda bunları söyləyib:

“Azərbaycan reytinqdə bir qədər yüksəkdə olsa da, bunun o qədər də əhəmiyyət kəsb etmədiyini düşünürəm. İnanıram ki, zehni, fiziki və taktiki cəhətdən daha yaxşı hazırlıqlı komandalar qalib gələcək. Azərbaycan limitdən imtina etdi və onların klubları Çempionlar Liqasında çıxış edir, bəs onlarda nə qədər yerli oyunçu oynayır? Milli komanda üçün tələblər nədir? Düşünürəm ki, Azərbaycanda prioritet klub futboludur, milli komandaya çox təzyiq yoxdur. Onlar bu yolu seçiblər. Düşünürəm ki, bizimki fərqli olmalıdır. Milli komandanın təzyiqi, tələbləri və gözləntiləri burada daha yüksəkdir”.