Rusiya ilə oyunun qəhrəmanı: “Beşiktaş”ın heyətində də belə qol vurmuşam”

17 yaşadək futbolçulardan ibarət milli komandamızın və “Beşiktaş”ın yarımmüdafiəçisi Metin Güler Futbolxeber.az saytına müsahibə verib.

- Bu dəfə yoxlama oyununda Rusiyanı məğlub edə bildiz (1:0). Görüşlə bağlı nə deyə bilərsən?

- Birinci oyunda Rusiyaya uduzmuşduq. Həmin görüşdə xeyli səhvə yol vermişdik. Məhz həmin səhvlərdən sonra rəqib qapımıza 5 qol vurmuşdu. Matçdan sonra görüşü yenidən izlədik. Məşqçilər analiz apardılar və komanda olaraq səhvlərimizi bizə izah etdilər. Bu gün həmin səhvləri təkrarlamadıq. Ötən oyundakı çatışmazlıqları aradan qaldırdıq. Bu dəfə daha inamlı çıxış etdik və qələbə qazandıq.

- Məhz sənin vurduğun baxımlı qol komandamıza qələbə qazandırdı...

- Oyun ərzində çox qol şansımız olmadı. Matçın sonunda qələbə qolunu vurmağı çox istəyirdik. Elə alındı ki, komanda yoldaşım topu yerə çox gözəl endirdi. Mən də saxlamadan qapıya zərbə endirdim. Belə qola imza atdığım üçün şadam.

- Daha əvvəl belə qol vurmuşdun?

- Bəli, daha əvvəl də vurmuşam. “Beşiktaş”ın heyətində beynəlxalq turnirdə buna bənzər epizodda fərqlənmişdim.

- Avropa çempionatına 2 aydan bir qədər artıq vaxt qalıb. Komandamızın hazırlıqlarını necə dəyərləndirirsən?

- Məncə, düzgün yoldayıq. Komanda hər gün daha da artırır.  Müəyyən fasilədən sonra Bakıda toplanış keçirik. Düzdür, Rusiyaya qarşı ilk görüşdə inamsız təsir bağışlamışdıq. Amma bu gün daha yaxşı oyandıq. Zamanla daha da irəli gedəcəyik.

- Doğukan Öksüz və Murat Akpınar hazırda millinin düşərgəsində deyil. Ruslarla qarşılaşmalarda onların yoxluğu hiss olundu?

- Birinci oyunda komanda olaraq zəif çıxış etdik. Onların yoxluğu hiss olunurdu. Lakin bu gün səhvlərə yol vermədik və daha yaxşı oynadıq. Deyərdim ki, bugünkü görüşdə heç kimn yoxluğu hiss olunmadı. Əgər səhvlərimizi hər zaman belə tez aradan qaldıra bilsək, yaxşı nəticələr də qazanacağıq.

- Zədən nə yerdədi?

- Rəqiblə mübarizədə ayağımdan zərbə aldım. Sonra da şişdi. Ümid edirəm ki, ciddi problem olmayacaq.  

- Oyunun gedişində baş məşqçi Təbriz Həsənov səni həm yarımmüdafiənin sağ cinahında, həm də mərkəzdə sınayırdı. Hansı mövqedə oynamaq səninçün daha rahatdı?

- Klubda da məşqçilər bəzən cinahda, bəzən də mərkəzdə şans verirlər. Mənim üçün hansı mövqedə oynamağın ciddi fərqi yoxdu. Çıxış etdiyim mövqedən asılı olmayaraq, daim əlimdən gələnin ən yaxşısını etməyə çalışıram.