“Xəzər Lənkəran”ın kapitanı: “Qələbəyə layiq olan tərəf biz idik”

“Neftçi” ilə oyuna çox ciddi hazırlaşmışdıq. Çünki bu oyunun “Xəzər Lənkəran” üçün necə önəm kəsb etdiyini hamı bilir”. Futbolxeber.az saytına müsahibəsində bu sözləri “Xəzər Lənkəran”ın kapitanı Tural Cəlilov deyib.

T. Cəlilov “Neftçi”yə 0:1 hesabı ilə uduzduqları üçün təəsssüfünü gizlətməyib: “Oyun bərabər səviyyədə keçdi. Hətta deyərdim ki, ikinci hissə birincidəkindən daha yaxşı oynadıq. Qol vurmaq üçün şanslarıız da oldu. Lakin bunlardan yararlana bilmədik. 90 dəqiqə ərzində vuruşsaq da, təəssüf ki uduzduq”.

“Xəzər Lənkəran”ın kapitanı bəxtlərinin gətirmədiyin vurğulayıb: “Qələbəyə layiq olan tərəf biz idik. Amma bəxtimiz gətirmədi. Oyundakı ilk real qol vəziyyətini də biz yaratmışdıq. Həmin anda hesabı açsaydıq, qalib gələrdik”.

Cəlilov kubokda “Neftçi”yə qarşı keçirəcəkləri oyunlarda uğur qazanmağa çalışacaqlarını qeyd edib: “Əsas fikrimizi kuboka yönəltmişik. Avrokuboklara yollanmaq üçün yeganə şansımız kubokadı. Kubok görüşlərində “Neftçi”yə qarşı daha da istəkli oynayacağıq. Bütün gücümüzü meydanda qoyacağıq ki, “Neftçi”ni mübarizədən kənarlaşdıraq”.