Şahin Diniyev: "Oyunun ədalətli nəticəsi heç-heçə idi”

Azərbaycan Premyer Liqasının XXI turu çərçivəsində keçirilən “Kəpəz” - “Qarabağ” oyunundan (1:2) sonra hər iki komandanın baş məşqçisinin iştirakı ilə mətbuat konfransı reallaşıb. Futbolxeber.az-ın məlumatına görə, Gəncə klubunun baş məşqçisi Şahin Diniyev turun mərkəzi görüşü haqda belə danışıb: “Yəqin ki, siz də mənimlə razılaşarsız ki, bu oyun turun mərkəzi görüşünə oxşadı. Həm oyun, həm də gərginlik baxımından. Meydanda hər iki komanda tərəfdən təzyiq vardı, tərəflər bir-birindən ehtiyatlanırdı. Meydançanın hər qarışı uğrunda mübarizəli oyun oldu. Təvəzökarlıqdan uzaq olsa da, deyim ki, mənə elə gəlir oyunun ədalətli nəticəsi heç-heçə olmalı idi. Çünki hər iki komanda xala layiq idi. Standart vəziyyətlərdən iki kuryoz qol buraxdıq. İlk qoldan sonra futbolçularımız özündə güc tapıb hesabı bərabərləşdirdi. Bundan sonra kim qol vursaydı, həmin komanda da qələbə qazanacaqdı. Yetirmələrimə təşəkkür edirəm, bacardıqları qədər mübarizə apardılar. “Qarabağ”dan yalnız hesabda geridə qaldıq. İrəli baxmalıyıq, bizi bir-birindən çətin oyunlar gözləyir. Motivasiya olunmalıyıq. Uğur qazanmaq , turnir cədvəlində irəli getmək istəyiriksə, hər oyuna ciddi hazırlaşmalıyıq.Gələcək oyunlarda standartlarda buraxdığımız səhvləri təkrarlamamağa çalışacağıq” (klub saytı).