Şahin Diniyev: “Sona kimi ilk “dördlük”də qalmaq üçün vuruşacağıq”

“Kəpəz”in baş məşqçisi Şahin Diniyev Futbolxeber.az saytına müsahibə verib.

- Ötən həftə səhhətinizdə problem yaşanmışdı. Hazırda özünüzü necə hiss edirsiniz?

- Hazırda özümü yaxşı hiss edirəm. Artıq hər şey qaydasındadı.

- III dövrənin ilk oyununda “Qəbələ” üzərində 3:0 hesablı qələbə qazanan “Kəpəz” meydanda çox istəkli görünürdü. Komandanızın xüsusi motivasiyası nədən qaynaqlanırdı?

- Komandanın motivasiyanın olması üçün güc vacibdi. Daha əvvəl də demişdim ki, yaxşı hazırlıq keçmişik. Xüsusən də fiziki planda. Qalırdı planlarımızı meydanda həyata keçirmək. Uşaqlar da sağ olsunlar ki, bunun öhdəsindən gəldilər. Uğur qazanmaq üçün rəqibdən daha çox qaçmaq, meydanın hər qarışı uğrunda mübarizə aparmaq və ikili mübarizələrdən qalib ayrılmaq lazım idi. Komanda qarşıya qoyulan bütün tapşırıqları yerinə yetirdi.

- Səhhətinizdə yaranan problemlə görə komandadan ayrı düşsəniz də, son anda özünüzü Gəncəyə çatdırdınız. Bu məqamın da yəqin ki, futbolçularınızın əhval-ruhiyyəsinə müsbət təsir edib...

- Ola bilər ki, bu da təsir etsin. Komandamızda yer alan futbolçuların hamısı işinin peşəkarıdı. Ümumiyyətlə, hazırlıq müddətində komandanın durumuna baxırdım. Əvvəldən də demişdim ki, “Qəbələ” ilə oyunda başqa “Kəpəz” görəcəksiniz. Şadam ki, fikrimdə yanılmadım. Proqnozum özünü doğrultdu. Komanda məhz “Qəbələ” ilə oyunda formasının pik nöqtəsinə çatdı.

- Oyundan sonra “Qəbələ”nin baş məşqçisi Roman Qriçqorçuk, eləcə də bəzi futbolçular meydançanın durumundan şikayətləndilər. Onların bu fikrinə münasibətiniz necədir?

- Mən Qriqorçukun və ya “Qəbələ” futbolçularının dediklərinə cavab vermək istəmirəm. Yalnız onu deyə bilərəm ki, hər iki komanda eyni şəraitdə mübarizə aparırdı. Mən də istəyirəm ki, meydançanın durumu ideal olsun. Çünki “Kəpəz” də topla oynamağı sevən komandadı.

- Əvvəlki oyunlarda qazanılan qələbəyə görə klub rəhbərliyi “Kəpəz”ə 10 min manat mükafat verirdi. Sirr deyilsə, “Qəbələ” üzərindəki qələbəyə görə nə qədər mükafat aldınız?

- Həmin qələbəyə görə mükafat almamışıq. Bununla bağlı klub rəhbərliyi tərəfindən hər hansı söz deyilməyib. Amma biz bunu problem hesab etmirik. Çünki hazırda maddi durumu bilirik. “Kəpəz” hazırda hər hansı mükafat, hədiyyə haqda yox, uğurlu nəticə qazanmaq barədə düşünür.

- Qış fasiləsində heyətə qatdığınız Namiq Ələsgərovun rəsmi debütunu necə dəyərləndirirsiz?

- Namiq komandaya hələ tam adaptasiya olmayıb. Zamanla daha çox faydalı olacağına inanıram. Hazırda uyğunlaşma baxımından hər hansı bir problem yaşamır. Komandaya oturuşa bilib, ilk oyununda qol da vurdu. Həm müdafiədə, həm də hücumda komandaya kömək edirdi.

- III dövrə başlamamışdan öncə qeyd etmişdiz ki, “Kəpəz”in əsas problemi cinahlardadı. İlk oyuna əsasən bu problemi aradan qaldırdığınızı söyləmək mümkündür?

- Bir cinahda Namiq Ələsgərov, digərində isə Tural Rzayev çıxış etdi. Hər ikisi gənc futbolçudu və ilk oyunda pis təsir bağışlamadılar. Növbəti oyunlarda problemi tam həll edib-etmədiyimiz görünəcək.

- Bir müddət sınadığınız Vladimir Korobkanı geri göndərməyinizə səbəb nə oldu: bəyənmədiniz, yoxsa məsələ maddi durumla bağlı idi?

- Onun oyunu məni tam qane etmədi. Tural Rzayevdən güclü deyildi. Mənə ona kifayət qədər şans verdim. Lakin istədiyimi ala bilmədim. Legioner futbolçu seçimində diqqətli olmalıyıq. Korobka yerli oyunçu olsaydı, onu gözüyumulu komandaya götürərdim.

- Qarşıdan AZAL-la oyun gəlir. “Qəbələ”yə qarşı göstərilən oyunun davamını fevralın 7-də görə biləcəyik?

- Çətin sualdı. AZAL-la oyun “Qəbələ”yə qarşı keçirdiyimiz matçdan da çətin olacaq. Çünki eyni oyunu göstərmək asan məsələ deyil. Amma biz yenə də inamlı oyun göstərməyə çalışacağıq. Bu, ən çətin oyunlarımızdan biri olacaq. AZAL da son turda qələbə qazanıb və hazırda komandanın düşərgəsində yüksək əhval ruhiyyə hökm sürür.

- Turnir cədvəlinin üst pillələrində sıxlıqdı. “Kəpəz”i mövsümün sonunda ilk “üçlük”də görə biləcəyik?

- Turnir cədvəlinin yuxarı pillələrində həqiqətən də sıxlıqdı. Məncə, 7 komanda ilk 4 yer uğrunda mübarizə aparacaq. Biz də sona kimi ilk “dördlük”də qalmaq üçün vuruşacağıq.

- Digər iddialı komandalardan fərqli olaraq, “Kəpəz” kubokda mübarizəni dayandırıb. Bunu sizin üçün üstünlük hesab etmək olar?

- Biz əvvəldən də bilirdik ki, 2 cəbhədə vuruşa bilməyəcəyik. Amma onu da deyim ki, kubokda layiq olmadığımız məğlubiyyətlə üzləşdik. Futboldu və irəli baxmaq lazımdı.