Rahid Əmirquliyev “Xəzər Lənkəran”dan gedə bilər: “...nəyisə dəyişmək lazımdı”

“Xəzər Lənkəran”ın kapitanı Rahid Əmirquliyev Futbolxeber.az saytına müsahibə verib.

- Premyer Liqanın XIII turunda “Xəzər Lənkəran” öz meydanında ”Neftçi”yə 0:2 hesabı ilə uduzdu. Oyunla bağlı nə deyə bilərsən?

- Bilirdik ki, çətin oyun olacaq. Bununla belə, matça ciddi hazırlaşmışdıq. Uzun illərdi evdə “Neftçi”yə uduzmurduq. Bu dəfə də seriyanın qırılmamasını istəyirdik. Məqsədimiz layiqlli oyun göstərib, sərfəli nəticə qazanmaq idi. Lakin təəssüflər olsun ki, alınmadı və uduzduq.

- Fasilədən sonra zəif oyun göstərməyinizin səbəbi nə idi?

- Səbəbini bilmirəm. Çoxlu səhvlər buraxdıq. Rəqib də bundan yararlandı. Lakin belə davam edə bilməz. Azarkeşlərimizin gözü önündə nə qədər uduzmaq olar? Gəlib komandanı dəstəkləyirlər. Biz izə onları sevindirə bilmirik. Yanvara kimi səbr etmək lazımdı. Belə davam edə bilməz, nəyisə dəyişmək lazımdı. Belə vəziyyət “Xəzər Lənkəran”a yaraşmır.

- Komandanı təkbaşına irəli aparmaqdan yorulmamısan?

- Tək mən komanda üçün çalışmıram. Hamı əlindən gələni edir. Sadəcə, psixoloji cəhətdən işimiz çətindi. Tez-tez uduzuruq. Bu isə gənclərə də, bizim özümüzə də pis təsir edir.

- Yanvardan sonra vəziyyətin dəyişəcəyinə ümid var?

- Mən bu barədə heç nə bilmirəm. Rəhbərlik söz verib. Onlardan soruşsaz, daha yaxşı olar. Mənim fikrimə gəldikdə, söz veriblər ki, vəziyyət düzələcək. Dediyim kimi, belə davam edə bilməz.

- Vəziyyət dəyişməyəcəyi halda, qışda komandanı tərk etməyin mümkündü?

- Mənim “Xəzər Lənkəran”la mövsümün sonuna qədər müqaviləm var. Amma nəyisə dəyişmək lazımdı. Belə vəziyyətdə oynamaq çətindi. Əgər, vəziyyət yaxşılığa doğru dəyişsə, oynamaq olar. Əks halda... Belə oynamaqdansa, oynamamaq daha yaxşıdı.

- Deməli, yanvarda vəziyyət dəyişməsə Rahid Əmirquliyev “Xəzər Lənkəran”ı tərk edəcək?

- Hər şey ola bilər. Ancaq bir daha təkrar edirəm ki, mənim klubla maya kimi müqaviləm var. Yanvarda hər şeyə aydınlıq gələcək.