Xaqani Məmmədov rüşvət qalmaqalından danışdı: “Montajdı”

"Bu videonun məhz indi, Əliyar Ağayevin avrokubokların qrup mərhələsində debüt edəcəyi bir vaxtda çıxması təsadüfi deyil”. Futbolxeber.az-ın məlumatına görə, bu sözləri AFFA Hakimlər Komitəsinin sədri Xaqani Məmmədov deyib.

Bu gün mətbuatda AFFA Hakimlər Komitəsinə başçılıq edən Xaqani Məmmədovun 2001-ci il, iyulun 28-i UEFA Kubokunun "Osiek" (Xorvatiya) və "Dinaburq" (Latviya) matçında qonaqlardan rüşvət təklifi alması görüntüsü yayılıb.

Məsələ ilə bağlı rekord.az-a açıqlama verən qurum rəhbəri bunları deyib: “Anar Salmanov özü də qeyd edir ki, bu disk yalnız onda və Ramin Musayevdə vardı. Həm də deyir ki, o yaymayıb. Bu iki nəfər verməyibsə, video medianın əlinə necə keçib? Zamanın belə seçilməsi məqsədlidi, mənə qarşı xüsusi hazırlanmış plandı.

Oyunun özünə gəlincə, o matçdan heç nə yadımda qalmayıb. 15 il əvvəl baş verənləri xatırlamağım mümkün deyil. Maraqlıdı, rüşvət verilibsə, alınıbsa, niyə həmin nəticə olmayıb? Pul alınsaydı, "sifariş" yerinə yetirilərdi. "Lazım olan" nəticə olmayıb, ona görə də iddialar yersizdi. Həmin vaxt komandanın baş məşqçisi indi "Qəbələ"də işləyən Roman Qriqorçuk idi. Belə şey olsaydı, nəvaxtsa, hardasa bu haqda danışar, təsdiqləyərdi. Videonun özü isə montajdı. Yüksək səviyyədə, peşəkarlar tərəfindən hazırlanmış montaj".