“Qəbələ” - “Borussiya” matçının qiyməti: 2100 avro

“Borussiya” azarkeşləri Bakıya səfər etməyə hazırlaşırlar. Futbolxeber.az-ın məlumatına görə, Dortmund klubunun fanatları Avropa Liqasının qrup mərhələsi çərçivəsində keçiriləcək qarşılaşmanı stadiondan izləmək istəyirlər.

Oktyabrın 22-də “Bakcell Arena”da baş tutacaq görüşə biletlərin qiymətinin 3-20 manat arası olması almanları daha da həvəsləndirib. Almanlar doğma komandalarını dəstəkləmək üçün hətta 4000 km-ə yaxın məsafəni qət etməyə də razıdılar. Ancaq klubun yerli mətbuata verdiyi informasiyaya əsasən, azarkeşlərin komanda ilə eyni vaxtda Bakıya gəlib-getmələri, burda məskunlaşmaları ümumilikdə 2100 avro dəyərindədi.

Almanlar “Bakcell Arena”nın nisbətən az (12000) azarkeş tutumuna malik olmasını xüsusi vurğulayıblar. Bu üzdən bir çox alman fanat Bakıya gələ bilməyəcək.

Qeyd edək ki, “Borussiya”nın qrupda PAOK-la səfər qarşılaşması zamanı Almaniyadan Yunanıstana 1300 azarkeş getmişdi.

Mənbə: apasport.az