Tarixi oyunun hakimi Bakıya gəlir

Dünya çempionatının seçmə mərhələsi çərçivəsində baş tutacaq Azərbaycan - Lüksemburq görüşünün hakimin müəyyənləşdiyi haqda xəbər vermişdik. Matçı Mihay Fabian idarə edəcək.

Futboxleber.az-ın məlumatına görə, 1980-cı ildə anadan olan Fabian 2007-ci ildən FİFA referisi adını daşıyır. Macar referi UEFA-nın ikinci kateqoriyalı hakimləri arasına daxildir.

Mihaly Fabianla bağlı  ən maraqlı fakt Azərbaycan futbolu tarixində xüsusi yeri olan görüşü idarə etməsidir. Söhbət 2009-cu ilin 23 iyulunda Bakıda baş tutan “Qarabağ” - “Rusenborq” matçında gedir. Ağdamlıların möhtəşəm qələbəsi ilə yekunlaşan həmin matçı məhz macarıstanlı hakim idarə edib. Həmin matçda "Qarabağ"dan yalnız Elvin Məmmədova sarı vərəqə verən macar referi rəqibin 5 futbolçusunu cəzalandırıb.

Bu, Fabianın təmsilçilərimizin iştirakı ilə idarə etdiyi ilk matç deyil. Belə ki, macar referi 2007-ci ildə U-21-lər arasında keçirilən Yunanıstan - Azərbaycan (4:1), eləcə də ötən il Avroliqanın ikinci təsnifat mərhələsi çərçivəsində baş tutan "İnter" - "Asteras" (1:1) matçlarında ədaləti qoruyub.