Azərbaycanlı futbolçular türkiyəli məşqçinin istefasına səbəb oldu

Türkiyənin I liqa təmsilçisi "Boluspor" klubunun baş məşqçisi Ümit Özatın vəzifəsindən istefa verməsinin səbəbləri müəyyənləşib. Futbolxeber.az-ın məlumatına görə, buna Özatın azərbaycanlı futbolçular - Ruslan Tağızadə və Nurlan Novruzovun transferi ilə bağlı rəhbərliklə razılığa gələ bilməməsi səbəb olub.

Qardaş ölkənin "BoluExpress" qəzeti bu haqda belə yazıb: "Daha öncə rəhbərlik və baş məşqçi arasında transferlərlə bağlı fikir mübadiləsi olmayıb. Tağızadə və Novruzovun klub rəhbərliyinin razılığı olmadan Boluya dəvət edildiyi bildirilib.

Rəhbərlik hər iki futbolçunun Türkiyəyə gəlməsi üçün bilet almaq istəməyib. Belədə Ümit Özat Tağızadə və Novruzovun biletlərini alaraq onların Boluya gəlmələrini təmin edib. Bundan sonra klub rəhbərliyi iki futbolçu ilə müqavilə imzalamaq istəmədiklərini açıqlayıb. Özat isə hər iki futbolçu ilə müqavilə imzalanmayacağı təqdirdə istefa verəcəyini bildirib. 38 yaşlı mütəxəssisin istəyi yerinə yetirilmədiyindən o, komandadan getmək qərarı verib" (qol.az).