Draqolyub Saviç: “Bu iki oyun göstərdi ki, biz çempion ola bilərik”

“Neftçi”nin yarımmüdafiəçisi Draqolyub Saviçin Futbolxeber.az saytına müsahibəsi

- Azərbaycan Premyer Liqasının 8-ci turunda “Qarabağ”la heç-heçə oynadınız. 3:3-lük bərabərliyi necə şərh edərdiniz?

- Çox gərgin və çətin oyun idi. Layiqli mübarizə apardıq. İkinci hissədə əks-hücumlara üstünlük verirdik. İstədiyimiz oyunu sərgiləyirdik. 3 qol vurduq. 1 qolumuz da sonradan VAR-ın qərarı ilə ləğv olundu. Biz “Neftçi”yik, sona qədər mübarizə aparmalıyıq.

- Qələbə hesabını qorumaq üçün nə çatışmadı?

- Dəqiq səbəb göstərmək çətindir. Lakin əminliklə deyə bilərəm ki, bu nəticə bizi daha da güclü edəcək.    

- Bu matçda həm də “Neftçi”də qol hesabını açdınız...

- Bəli, buna görə şadam. Digər tərəfdən isə ikinci qolumun hesaba alınmamasına və yekunda qələbə qazana bilmədiyimizə görə məyusam.

- Necə düşünürsünüz, bu qol növbəti matçlarda əsas heyətdə yer almağınıza kömək edə bilər?

- Bu barədə nəsə deyə bilmərəm. Mən “Neftçi”nin bir parçası olduğum üçün xoşbəxtəm. Hər zaman da komandaya kömək etməyə hazıram. Baş məşqçi nə zaman şans versə, əlimdən gələni edəcəyəm. Məqsədim komandama faydalı olmaqdır.

- Azarkeşlər barədə nə deyə bilərsiniz?

- Heyranedici, möhtəşəm idilər. Azarkeşlərimiz bizim üçün çox vacibdirlər. Onlar həqiqərən də 12-ci oyunçudurlar. Vurduğum qolu fanatların önündə qeyd etmək çox xoş idi.

- İki iddialı rəqib – “Sabah” və “Qarabağ”la oyunlarda “Neftçi” 2 xal qazandı, yoxsa 4 xal itirdi?

- Bu iki oyun göstərdi ki, biz çempion ola bilərik. Məncə, 2 xaldan daha artığına layiq idik. İstəyimizə çatmaq üçün daha çox çalışmalıyıq.

- Növbəti turda daha bir iddialı rəqib – “Turan Tovuz”la üz-üzə gələcəksiniz. Həmin matçdan gözləntiləriniz nədir?

- Maraqlı oyun olacaq. Rəqib güclü olsa da, bizim hədəfimiz yalnız və yalnız qələbədir. Doğma azarkeşlərimiz önündə oynayacağıq. Çox istərdim ki, həmin matçda bizi dəstəkləyənlərin sayı daha çox olsun. Çünki fanatlar gücümüzə güc qatırlar. Biz də onları sevindirmək üçün əlimizdən gələni edəcəyik.

İbrahim Cəfərov