Rəşad Sadıqov: “Hər şeyi mətbuat konfransında danışmaq olmur”

“Olduqca maraqlı oyun alındı. İlk hissəfə meydanda taktiki savaş gedirdi. Düşünürəm ki, iki komanda da bu gün 1 xal qazandı. İkinci hissədəki oyuna görə futbolçularıma təşəkkür edirəm. Rəqib qapıçının qurtatışları qırılma nöqtəsi idi. Bu cür atmosferdə oynamaq çətindir. Rəqib həqiqətən də 12 oyunçu ilə oynayırdı. Qoldan sonra verdiyimiz reaksiya məni məmnun etdi. Amma bu, qələbə qazanmağa kifayət etmədi”.

Futbolxeber.az saytının məlumatına görə, bu sözləri “Zirə”nin baş məşqçisi Rəşad Sadıqov Azərbaycan Premyer Liqasının 8-ci turunda səfərdə “Kəpəz”lə bərabərə qaldıqları oyundan (1:1) sonra deyib.

Daha sonra mütəxəssis jurnalistlərin suallarını cavablandırıb:

- Heyətdə zədəli futbolçular çoxdur. Bu gün meydanda 5 yerli oyunçu var idi. Düşünmürsünüz ki, keyfiyyət öz sözünü dedi?

- Bəli, ciddi itkilərimiz var. Eren Aydın, İssa Cibrilla zədədən yeni qayıdıb. Əlimizdə olan futbolçular risk altındadır. Problemlərimiz ciddidir. Əlimizdən gələni edirik. Düşünürəm ki, bu perioddan çıxacağıq.

- Gəncə şəhər stadionundakı atmosferlə bağlı fikirləriniz necədir?

- Həqiqətən azarkeşlər möhtəşəm idi. Burada oynamaq çox yaxşıdır. Sevinirəm ki, Azərbaycanda belə stadion var. Bu gün məğlub olsaydıq da, məyus olmayacaqdım.

- Giorgi Papunaşvilinin az oynamasının səbəbi nədir?

- Yeni seleksiyalardan sonra komandada rəqabət artıb. "Şamaxı" və "Kəpəz"lə matçda Papunaşvilini əsas heyətdə planlaşdırırdıq, amma xəstələndi. 10 gün yataqdan qalxa bilmədi. Bizimlə cəmi bir məşqə çıxmışdı.

-  Komanda mövsümə 3 qələbə ilə başladı, amma son 5 turda qalibiyyət yoxdur. Sizcə, nə çatmır?

- Bunun üzərində işləyirik. Hər şeyi mətbuat konfransında danışmaq olmur. Öz aramızda müzakirə edirik. Son iki matçda futbolçularda həyəcan hiss olunur. Bu, yüz faizli qol epizodlarında özünü büruzə verir. Üzərimizdə müəyyən təzyiq var. Hər il belə period olur. Əlimizdən gələni edirik ki, qələbə qazanaq. İddialı olmaqdan ötrü uğurlu olmaq da şərtdir. Bəxt deməyim, həmin sözü xoşlamıram. Ümid edirəm ki, qarşıdakı turlarda düzələr.