İtirilən 2 xal, qazanılan onminlərlə ürək...

“Neftçi” qayıdır”, “Neftçi” qayıdası olmadı”, “Neftçi” yarıyoldan qayıtdı” – bu tip atmacalar son illər sosial şəbəkələrdə zarafat predmetinə çevrilmişdi. Rəqib komandanın azarkeşləri tez-tez flaqmanın uğursuzluqlarına bu cür atmacalarla reaksiya verirdilər. Həqiqətən də son illər çempionluq bir yana, “ağ-qaralar” hətta ilk üçlüyə, avrokuboklara belə həsrət qalırdı. Lakin dünən “Qarabağ”a qarşı keçirilən oyundan sonra artıq əminliklə söyləmək olar – “Neftçi” qayıtdı!

Əslində bu qayıdışın ilk işartıları ötən mövsümün sonunda görünürdü. Komanda əvvəlcə 5 illik uğursuz seriyaya son qoyaraq əzəli rəqibi “Qarabağ”ı məğlub etdi, daha sonra isə avrokubok həsrətinə son qoydu.

Flaqman cari mövsümə də uğurla start verdi. Artıq əvvəlki illərdən fərqli olaraq “Neftçi” “İmişli”, “Şəfa” kimi sıradan rəqiblərlə oyunlarda xal itirmir. Lakin əksəriyyət yenə də tələsmir, dəqiq “diaqnoz qoymaq üçün” 7-ci və 8-ci turları gözləyirdi. Çünki “Neftçi” əvvəlcə son çempion, daha sonra isə “Qarabağ”la üz-üzə gələcəkdi. Komandanın qayıdıb-qayıtmadığı, çempionluq mübarizəsinə nə qədər hazır olub-olmadığı məhz bu iki matçda bilinəcəkdi. Bilindi də! Son iki oyun göstərdi ki, “Neftçi” əzəmətini qaytarmaq yolundadır. Bəlkə də əvvəldən bu iki matçda iki xal “Neftçi” üçün yaxşı nəticə hesab olunacaqdı. Lakin bu gün qazanılan 2 xal təəssüflə qarşılanır. Çünki flaqman hər iki matçda rəqibi ilə müqayisədə qələbəyə daha yaxın idi. “Sabah”la görüşdə Simiçə verilməyən qırmızı vərəqə, son 10 dəqiqədə qaçırılan real qol epizodları, son saniyələrdə Pokatilovun fantastik seyvi – bütün bunlar qələbəyə mane oldu. Dünənki matçda isə “Neftçi” 89-cu dəqiqəyə qədər qələbəyə rəqibi ilə müqayisədə 2 addım daha yaxın olsa da, yekunda 1 xalla kifayətləndi...

Söhbət təkcə qazanılan nəticədən getmir. “Neftçi”nin sərgilədiyi oyun da alqışalayiqdir. Artıq əvvəlki kimi meydanda uduzmaqdan qorxan, aciz, güclü rəqiblərlə oyunlarda əsasən müdafiəyə diqqət ayıran “Neftçi” görmürük. Bu komanda futbol oynamağı bacarır. Bu komanda istənilən rəqibə qarşı başabaş mübarizə apara bilər. Bu komanda çempionluq uğrunda mübarizə apara bilər. Bu komanda hətta çempion da ola bilər...

Dünən təkcə meydanda yox, meydandan kənarda da komplektləşmiş, bir olan “Neftçi” var idi. 3 sektoru dolduran “ağ-qaralı” azarkeşlər minimum özlərindən 2 dəfə çox olan rəqib fanatları kölgədə qoymuşdular. Dünən bəzən eyni anda ehtiyat oyunçular skamyasından 6-7 nəfər ayağa qalxırdı, hansısa epizoda reaksiya verirdi. Bir sözlə, kollektiv bir yumruq kimi birləşmişdi. Rəhbəri, azarkeşi, futbolçusu, məşqçisi, tərcüməçisi, inzibatçısı, həkimi ilə birgə...

Dünən “Neftçi”nin itirdiyi iki xal oldu. Qazandıqları isə bundan qat-qat artıq idi...

İBRAHİM