Fariz Nəcəfov: “Meydanda 1 komanda var idi”

“Qəbələ”nin vitse-prezidenti Fariz Nəcəfov Futbolxeber.az saytının Qəbələyə ezam olunmuş əməkdaşına müsahibə verib.

- “Qəbələ” Tiflis “Dinamo”sunu mübarizədən kənarlaşdırdı. Görüşlə bağlı fikirləriniz necədir?

- Uşaqlar nə lazımdısa, onu da etdilər. Əvvəldən də  deyilmişdi ki, xarakter nümayiş etdirilməlidir. Meydanda 1 komanda var idi. Futbolçulara mübarizə əzminə görə təşəkkür edirəm. Biz cütün taleyini Tiflisdə həll etməliydik. Müəyyən səhvlər buna imkan vermədi. Əsas odur ki, işin öhdəsindən gəldik.

- Sona yaxın qol gecikdikcə mərhələ adlamaqdan əlinizi üzmüşdünüz?

- Yox. Bilirdim ki, qol olacaq. Təbii ki, futbolda hər bir nəticə mümkündür. Amma mən əvvəldən uğur qazanacağımıza inanırdım. Çünki neçə gündür komandanın yanındayam, uşaqların çəkdikləri əziyyəti görürəm.

- İlk oyundan sonra Tiflisdə sizinlə söhbətimizdə yeni transferlərdən razı qalmadığınızı bildirmişdiniz. Bu gün (söhbət dünən olub-red.) necə, onların çıxışı size qane etdi?

- Yenə də tam razı qalmadım. Onlardan daha çoxunu gözləyirəm. Oyunlar keçdikcə istədiyimiz kimi çıxış edəcəklərinə inanıram.

- Razısız ki, hazırda “Qəbələ”nin əsas problem hücumdadı?

- Razıyam.

- İkinci mərhələ öncəsi hücumçu transfer olunacağını gözləmək olar?

- 1 hücumameyilli futbolçu ilə danışıqlar yekunlaşmaq üzrədir. Qarşıdakı günlərdə transfer reallaşmalıdır. Amma növbəti mərhələ üçün onu sifariş edə biləcəyimizi dəqiq söyləmək çətindir. Vaxt məsələsinə görə çatdırıb-çatdırmayacağımızı bilmirəm.

- Həmin futbolçu Julius Vobaydı?

- Yox.