Rauf Əliyev: “Klubların çoxunun maliyyə problemi var, yaxşısı xaricə getməkdi”

“Neftçi”nin sabiq hücumçusu Rauf Əliyev Futbolxeber.az saytına müsahibə verib.

- Ölkə mətbuatında “Kəpəz”ə transfer olunacağın haqda xəbərlər yayılıb. Bu, nə dərəcədə doğrudur?

- Belə xəbər yayılması haqda məlumatım var. Lakin yayılan xəbər yalandı. “Kəpəz”ə keçmirəm. Belə bir söhbət yoxdu.

- Ümumiyyətlə, “Kəpəz” rəsmiləri ilə aranızda hansısa danışıq olub?

- Bu klubdan heç bir təklif almamışam.

- Şahin Diniyevlə də hər hansı müzakirə aparmamısan?

- Yox. Şahin bəylə nə görüşümüz, nə də telefon danışığımız olub.

- “Kəpəz” məsələsini kənara qoyaq. Karyeranla bağlı nə yenilik var?

- Hələ ki, heç bir yenilik yoxdur. Müəyyən danışıqlar gedir. Lakin ortada konkret heç nə yoxdur. Sadəcə, söhbətlət var. Ona görə də indidən heç nə deyə bilmərəm.

- Danışıq apardığın klubun adını açıqlamaq istəmirsən?

- Dediyim kimi, ortada konkret heç nə yoxdur. Hansısa yenilik olsa, bu haqda məlumatınız olacaq.

- Yerli klubla danışıq aparırsan, ya əcnəbi?

- Yerli klublardan heç biri ilə danışıq aparmıram.

- Əksər azərbaycanlı futbolçular Türkiyə PTT liqasına yollanırlar. Sən də həmin yolla gedəcəksən?

- Türkiyə də ola bilər, başqa ölkə də. Bundan artıq heç nə deyə bilmərəm.

- Qeyd etdin ki, yerli klubların heç biri ilə danışıq aparmırsan. Azərbaycan klubları nə üçün Rauf Əliyevə maraq göstərmilər?

- 1-2 klubu çıxmaqla klubların çoxunun ciddi maliyyə problemləri var. Ona görə də yaxşısı xaricə getməkdi.

- Hər şey pula bağlıdır?

- Söhbət puldan getmir. İndiyə kimi heç vaxt ölkə xaricində oynamamışam. İndi özümü sınamaq istəyirəm,

- Çıxış edəcəyin klubun adı nə vaxt bilinəcək?

- Dəqiq vaxt söyləmək çətindir.

- Yəni, tələsmirsən?

- Hə, tələsməyə ehtiyac yoxdu. Vaxt çoxdu hələ.