Jaba: “Vəziyyət düzəlsə, yenidən “Bakı”ya qayıdacağam”

“26-sı axşam saatlarında Bakını tərk edəcəyəm. Buna görə də “Qəbələ”yə qarşı baş tutacaq görüşdə meydana çıxmayacağam”. Futbolxeber.az saytına müsahibəsində bu sözləri “Bakı”nın hücumçusu Jaba deyib.

Təcrübəli forvard hələlik geri qayıdıb-qayıtmayacağını bilmədiyini bildirib: “Bakı”dakı problemlər hamıya məlumdur. Hazırda komanda maddi baxımdan çətinlik yaşayır. Bununla belə, “Bakı”da oynamaq mənim üçün hər zaman xoşdur. Burada çox gözəl günlər keçirmişəm. Kuboku qazanmışıq, gümüş medallara sahib çıxmışıq, eləcə də avrokuboklarda çıxış etmişik. Lakin hazırda komanda çempionluq uğrunda mübarizə aparmır. Ailəm də yanımda deyil. Yenidən “Bakı”ya geri dönəcəyimi indidən söyləyə bilmərəm”.

Jaba klubun prezidenti Hafiz Məmmədov barədə müsbət fikirlər səsləndirib: “Bakı”nın prezidenti Hafiz Məmmədovun necə insan olduğunu hamı bilir. Mənim Hafiz bəyə çox böyük hörmətim var. İnanıram ki, tezliklə vəziyyət dəyişəcək. “Bakı” əvvəlki gücünü geri qaytaracaq. Komandanın vəziyyəti düzəlsə, yenidən “Bakı”nın formasını geyəcəyəm. “Bakı” mənə doğma klubdur”.

Braziliyalı hücumçu cari mövsümdə meydana çıxdığı son görüş - “Neftçi” ilə matç haqda da fikirlərini açıqlayıb: “Neftçi”yə qarşı çox yaxşı oynadıq. Qələbə də qazana bilərdik. Lakin penaltini qaçırdıq. Mən də istəyirəm ki, penaltiləri Nurlan Novruzov yerinə yetirsin. Çünki onun çempionatın bombardiri olmasını arzulayıram. Bu gün “Bakı”da çox istedadlı gənclər var. Onları parlaq gələcək gözləyir. “Bakı” hər zaman azərbaycanlı futboluna xeyir verib. Bundan sonra da belə olacaq”.