Hafiz Məmmədov Rövnəq Abdullayevlə görüşəcək: “Bakı”sız Premyer Liqa olmaz!” EKSKLÜZİV

“Bakı” klubunun prezidenti Hafiz Məmmədov komandasının növbəti mövsümdə də Premyer Liqada oynamasını istəyir. Futbolxeber.az-ın məlumatına görə, Məmmədov Premyer Liqanı “Bakı”sız təsəvvür etmədiyini bildirib: “Bakı” daim Azərbaycan futboluna xidmət edib. “Bakı”sız Premyer Liqa olmaz. Mən çempionatı “Bakı” olmadan təsəvvür edə bilmirəm. Bu klub Azərbaycan futboluna xidmət etmək üçün yaradılıb. Hazırda müəyyən məsələlər var. İndi onların həlli ilə məşğuluq. Həmin problemləri həll etdikdən sonra hər şey yaxşı olacaq. İnanıram ki, növbəti mövsümdə də “Bakı” Premyer Liqada çıxış edəcək”.

Futbolxeber.az-ın əldə etdiyi başqa məlumata görə, bu yaxınlarda Hafiz Məmmədovla AFFA prezidenti Rövnəq Abdullayev arasında görüş olacaq. Məhz həmin görüşdə “Bakı”nın Premyer Liqada qalıb-qalmayacağı müəyyənləşəcək.

Qeyd edək ki, “Bakı” növbəti mövsümdə Premyer Liqada çıxış etmək lsenziya ala bilməyib. Amma AFFA-nın lisenziya verdiyi bəzi klubların taleyi qeyri-müəyyəndir. Onların nəinki növbəti mövsümdə Premyer Liqada çıxış edəcəkləri, heç növbəti mövsümün startına qədər mövcud olub-olmayaqları belə bilinmir.

Üstəlik, digər klublardan fərqli olaraq ciddi maliyyə problemi yaşamasına baxmayaraq, “Bakı” mövsümü başa vura bildi. Mövsümün gedişində “Araz Naxçıvan” kimi “Bakı”nın da Premyer Liqadan çıxacağı deyilsə də, komanda sona kimi duruş gətirdi. Bunda isə klubun öz yetirmələrinə güvənməsinin böyük rolu oldu. Əksər klublardan fərqli olaraq, əla infrastruktura sahib olan “Bakı”nın Premyer Liqada qalmaq şansı kifayət qədər yüksəkdir.